Sumakay ang Department of Trade and Industry (DTI) Region 2 sa viral na “Sharmaine” craze para magpaalala sa sellers at consumers: sa totoong produkto, hindi puwedeng basta palitan ang pangalan, label, o packaging dahil lang uso sa social media.
Nagsimula ang trend sa TikTok video ng content creator na si BAET, kung saan umarte siyang parang kausap ang isang orange na nagrereklamo sa pangalan nito.
“Naiinis naman ako ’te kasi parang ’di naman ako pinag-isipan,” sabi ng fictional orange.
“O ’di ba ikaw ang pangalan mo ay mango, pero dilaw ka naman. Parang obvious naman kasi sa ’kin te, orange, wala na bang ibang pangalan? Kaloka naman,” dagdag pa nito.
Nang tanungin kung anong pangalan ang gusto niya, sagot ng orange: “Sharmaine.”
“Ay, ang ganda. Ipa-notaryo natin ’yan,” sagot naman ng persona sa background.
Mula roon, sumabog ang joke. Dumami ang gumagamit ng “Sharmaine” bilang bagong tawag sa orange. May netizens na ipinakilala ang orange sa pamilya bilang si Sharmaine. May gumawa rin ng skit na bumibili ng Sharmaine-flavored juice sa sari-sari store.
Pati brands, nakisawsaw. Sa Facebook, nag-post ang SM City Legazpi ng fruits section kung saan ang oranges ay may label na “Sharmaine.”
Nag-react si BAET sa litrato at biro niya: “Hindi pa napapanotaryo, bakit niyo binebenta agad?”
Hindi rin nag-iisa si Sharmaine. Sumunod ang character na si Vanessa, isang fly na ayaw rin sa masyadong obvious na pangalan.
“Gusto ko lang din sana ng sariling pangalan,” sabi ng fictional fly.
“Ang totoong pangalan ko talaga ay Fly, ‘di ba? Napaka-obvious naman,” dagdag nito.
“Ang gusto ko talaga sanang pangalan ay Vanessa,” sabi pa ng character.
May nabanggit ding companion character na si Melanie, isang avocado, habang ginamit naman ng DTI Region 2 ang “Jung Cook” bilang punchline para sa rice cooker na kailangan pa ng approval.
Pero habang katuwaan sa internet ang pagpapalit ng pangalan ng orange, fly, avocado, at rice cooker, seryoso ang paalala ng DTI: iba ang meme, iba ang consumer protection.
Sa Facebook post, sinabi ng DTI Region 2: “Pero teka lang, hindi porket may trend, at may pa-‘Sharmaine moment’ na, eh pwede na basta-basta magbago ng ‘name,’”
Ipinaliwanag ng ahensya na ang produkto sa tindahan ay may dapat sundin na mga patakaran sa labeling, packaging, testing, at safety marks.
“Ang label? Dapat tama, malinaw, at sumusunod sa standards,” bahagi ng post ng ahensya.
Ayon sa DTI Region 2, hindi puwedeng nakabase lang sa personal na trip ang label ng produkto.
“Hindi lang sa ‘feeling ko mas bagay ng produktong ito ang label na ito,’” paalala nito.
Ginamit din ng ahensya ang running joke ng trend tungkol sa pagpapapanotaryo ng pangalan, pero nilinaw na hindi sapat ang biro kung produkto na ang pinag-uusapan.
“Hindi lang basta notarized. Dapat ‘certified’!” diin ng DTI Region 2.
Sa post, ginawang halimbawa ang “Jung Cook,” isang rice cooker na may markang “for approval,” bilang paalala na ang electrical products ay kailangang may Philippine Standard o PS mark, o Import Commodity Clearance o ICC bago ibenta.
Ibig sabihin, hindi lang ang pangalan ang mahalaga. Kailangang tama ang label, totoo ang impormasyon, dumaan sa tamang proseso, at hindi nanlilinlang sa mamimili.
As of writing, halos 7 million views na ang TikTok video ni Sharmaine ni BAET, habang papalapit naman sa 1 million views ang video ni Vanessa. /Bistado