Naantala ang inaasahang pag-angat ng credit rating ng Pilipinas matapos baguhin ng S&P Global Ratings ngayong linggo ang outlook nito mula “positive” tungo sa “stable.”
Sa parehong anunsyo, pinanatili ng S&P ang long-term sovereign rating ng bansa sa “BBB+” at short-term rating na “A-2.” Ibig sabihin, nananatiling investment grade ang Pilipinas, ngunit hindi muna inaasahan ang agarang pag-upgrade ng rating.
Ayon sa S&P, ang “positive” outlook ay karaniwang indikasyon ng posibleng pagtaas ng rating sa loob ng 12 hanggang 24 buwan. Sa paglipat sa “stable,” tinanggal ang ganoong inaasahan at ipinahiwatig na maaaring walang agarang pagbabago sa rating sa loob ng mas mahabang panahon.
Itinuro ng S&P ang tumitinding external risks bilang pangunahing dahilan ng pagbabago, partikular ang tensyon sa Middle East na nagtulak sa pagtaas ng global oil prices. Dahil umaasa ang Pilipinas sa imported na enerhiya, inaasahang lalawak ang current account deficit at hihina ang external position sa maikling panahon.
Gayunman, nilinaw ng ahensya na ang pagbabago ng outlook ay hindi dahil sa paghina ng domestic economy, kundi sa mas mataas na antas ng global uncertainty.
Batay sa datos ng S&P, bumagal ang paglago ng ekonomiya ng Pilipinas sa 4.4 percent noong 2025 mula sa average na 6.3 percent sa nakaraang tatlong taon. Iniuugnay ito sa pansamantalang pagbawas sa public infrastructure spending kasunod ng mga imbestigasyon sa flood-control projects.
Sa kabila nito, inaasahang babawi ang ekonomiya sa 5.8 percent growth sa 2026 habang humuhupa ang epekto ng pagbaba ng paggastos at tumataas na presyo ng enerhiya.
Sa medium term, tinaya ng S&P na lalago ang gross domestic product ng bansa ng average na 6.2 percent mula 2027 hanggang 2029, sa bisa ng suporta ng household consumption, remittances mula sa overseas Filipinos, at patuloy na pamumuhunan.
Sa inflation, inaasahang tataas ito sa humigit-kumulang 3.4 percent sa 2026 mula 1.7 percent noong 2025 dahil sa pagtaas ng presyo ng enerhiya, bago bumalik sa paligid ng 3 percent sa mga susunod na taon.
Sa panig ng pananalapi ng gobyerno, inaasahang unti-unting bababa ang deficit sa average na 2.9 percent ng GDP sa susunod na tatlong taon. Samantala, tinatayang bababa ang net public debt sa humigit-kumulang 42.5 percent ng GDP pagsapit ng 2029.
Ayon din sa S&P, inaasahang lalawak ang current account deficit sa 4 percent ng GDP sa 2026 mula 3.3 percent noong 2025, bunsod ng pagtaas ng gastos sa energy imports.
Sa kabila nito, nananatiling suportado ang external position ng bansa ng remittances at foreign exchange reserves na umabot sa USD107.5 billion noong March 2026.
Sa kabuuan, sinabi ng S&P na ang “stable” outlook ay sumasalamin sa inaasahan nitong mananatiling matatag ang paglago ng ekonomiya habang unti-unting inaayos ang fiscal balance, kahit may pressure mula sa global developments. /Bistado