Aabot sa $650 milyon, o humigit-kumulang P41.2 bilyon, ang posibleng makuhang pautang ng SM Prime Holdings Inc. (SMPH) mula sa dalawang international development banks para sa 360-ektaryang Pasay 360 waterfront project sa Pasay City.
Pinag-aaralan ng Asian Development Bank (ADB) ang pagpapautang ng $500 milyon o humigit-kumulang P31.7 bilyon, habang may hiwalay na $150-milyong financing proposal mula sa Asian Infrastructure Investment Bank (AIIB).
Gagamitin ang pondo sa pagtatayo ng mga kalsada, tulay, pasilidad laban sa pagbaha, utilities at iba pang imprastrakturang kailangan sa proyekto.
Nakatakdang talakayin ng ADB Board ang panukalang pautang sa November 25, 2026. Kailangan pa itong dumaan sa mga kinakailangang pag-apruba bago mailabas ang pondo.
Layunin ng SM Prime na gawing isang modernong waterfront district ang Pasay 360 na may mga tirahan, negosyo, pasyalan, pampublikong pasilidad at mga luntiang lugar.
Sa ilalim ng Presidential Proclamation No. 1479, sakop ng proyekto ang 213.57 ektaryang lupa, katumbas ng humigit-kumulang 59 porsiyento ng kabuuang lugar na ide-develop.
Ayon sa investment research ng AB Capital Securities, nasa isang porsiyento pa lamang ang natapos na pangunahing imprastraktura sa proyekto noong ikalawang quarter ng 2026.
Kabilang sa mga kailangang asikasuhin ang pagsusuri sa epekto ng proyekto sa kapaligiran at mga komunidad, pag-isyu ng land titles at iba pang dokumentong kailangan para sa development.
Tinukoy rin ng ADB ang malalaking environmental at social risks na dapat tugunan bago maisulong ang proyekto.
Ayon sa AB Capital, makatutulong ang mga panukalang pautang para maipagpatuloy ang konstruksyon, ngunit nakadepende pa rin ang susunod na yugto sa mga pag-apruba at dokumentasyon ng lupa.
Sa ngayon, pinag-aaralan pa lamang ang kabuuang $650-milyong financing at wala pang kumpirmasyong naaprubahan o naibigay ang mga pautang sa SM Prime. /Bistado