Umiskor si Javi Gomez de Liano ng pinakamataas na 19 puntos habang pinangunahan ni Peter Alfaro III ang mga reserba sa pagratsada ng Magnolia kontra Rain or Shine, 107-103, at pagsiguro sa No. 1 seeding sa Group B ng PBA Season 50 Governors’ Cup sa Ynares Center Antipolo nitong Miyerkules.
Dahil pinagpahinga ang mga pangunahing manlalaro sa kanilang huling laro sa eliminations, ang mga kasunod na manlalaro ang nanguna para sa Magnolia, na nagtapos sa eliminations na may 7-3 kartada.
Itinakda ni Gomez de Liano ang takbo ng laro sa pamamagitan ng mahusay na 19 puntos, kabilang ang anim na tres mula sa 10 pagtatangka sa labas ng arko.
Nag-ambag si Alfaro ng 17 puntos mula sa bench, nagdagdag si Jeron Lastimosa ng 16, at nakapag-ambag si Yukien Andrada ng 11 — tatlong reserbang manlalaro na nagtala ng double figures.
Maging ang import na si KJ Buffen, na naglaro lamang ng 16 minuto, ay nagpakitang-gilas sa kanyang 16 puntos, anim na rebound at tatlong assist.
“’Yun naman ang laging sinasabi ko sa team. It doesn’t matter who’s on the floor, should be ready to play,” ani Magnolia coach LA Tenorio.
“Everybody practices the same. Everybody works hard in practice, so everybody knows the system. So I won’t be surprised na ‘pag ginamit sila sa laro, pwede silang magbigay ng impact. Pinahinga namin ‘yung starters and our off-the-bench players played like starters. ‘Yan ang maganda sa team natin, ‘yan ang culture,” dagdag ni Tenorio.
Ang Rain or Shine, na pinangunahan ni Adrian Nocum sa 25 puntos at ni import Aaron Fuller sa 18 puntos, ay bumagsak sa tabla sa No. 2 kasama ang Phoenix Super LPG sa 5-4 kartada.
Maglalaban ang dalawang koponan para sa ikalawang puwesto sa grupo sa pagtatapos ng eliminations sa Biyernes sa parehong venue sa Antipolo.
Samantala, pag-aagawan ng Barangay Ginebra (4-5), Meralco (4-6) at Blackwater (3-6) ang huling puwesto sa quarterfinals ng Group B.
Sa Group A, kumpleto na ang mga koponang uusad sa susunod na yugto: NLEX sa No. 1, San Miguel Beer sa No. 2, Converge sa No. 3 at TNT sa No. 4.
Sa unang laro, bumangon ang San Miguel mula sa 20 puntos na pagkaka-iwan upang makuha ang makitid na 135-133 panalo kontra kapwa quarterfinalist na NLEX.
Mintis ang layup ni George King sa huling 5.2 segundo, ngunit naibilang pa rin ang kanyang tira bilang go-ahead basket dahil sa malaking pagkakamali ni Robert Bolick, na nahuling humihila sa net habang nag-aagawan sa rebound, na nagresulta sa goal interference.
Nanatili ang iskor nang sumablay si LJ Gonzales sa pagtatangka ng tres mula sa kaliwang kanto at nasungkit ni Chris Ross ang defensive rebound bago tumunog ang huling buzzer.
Dahil sa panalo, nagtala ang SMB ng kaparehong kartada ng kanilang nakalaban para sa pangunguna sa Group A sa pagtatapos ng kanilang kampanya sa eliminations, na kapwa may 9-3 rekord. Gayunman, nakuha ng Road Warriors ang No. 1 puwesto dahil sa mas mataas na quotient.
Makakaharap ng NLEX ang No. 4 ng Group B sa susunod na round.
Ang Beermen, na natalo nang 14 puntos sa Road Warriors sa una nilang paghaharap, ay kailangang makuntento sa No. 2 puwesto at makakaharap ang koponang nasa ikatlong puwesto ng Group B sa best-of-five quarterfinals.
Gayunman, nasiyahan pa rin si coach Leo Austria sa ipinakitang laro ng kanyang koponan kahit wala ng epekto sa kanilang puwesto ang nasabing laban.
“I told the team, ‘Let us play to win’ even though we know this (game) is for positioning lang, eh,” aniya. “What we want to develop is the killer instinct that we’ve been having since we won our first championship (together).”
Pinangunahan ni King ang SMB sa 27 puntos at siyam na rebound, habang nagdagdag si June Mar Fajardo ng 26 puntos at 10 rebounds.
Nagtala rin si Don Trollano ng double-double na 23 puntos at 10 rebounds, kung saan 17 sa kanyang mga puntos ay naitala sa fourth period.
Nagtala rin si Marcio Lassiter ng 17 sa kanyang kabuuang 19 puntos sa third period, na tumulong upang manatiling malapit ang Beermen sa iskor na 96-112. Gayunman, nagawa pa rin ng Road Warriors na palawakin sa 20 puntos ang kanilang kalamangan nang dalawang beses, na ang huli ay sa iskor na 118-98.
Pinangunahan ni DeOnte DeAngelo Burton ang lahat ng manlalaro sa puntos at block sa 43 at anim, ayon sa pagkakasunod. Nag-ambag naman sina Schonny Winston at Gonzales ng tig-20 puntos, habang hindi rin naging sapat ang 15 assist ni Bolick, bukod pa sa kanyang 13 puntos.
Bago ito, si Fajardo ay naging ika-19 na miyembro ng 10,000-Point Club at ikalawang aktibong manlalaro lamang na nakarating sa nasabing milestone, kasunod ni Jayson Castro ng TNT sa Commissioner’s Cup noong Mayo.
The scores:
First Game
SMB 135 – King 27, Fajardo 26, Trollano 23, Lassiter 19, Perez 14, Ross 8, Ahanmisi 8, Cruz 4, Tautuaa 4, Brondial 0.
NLEX 133 – Burton 43, Winston 20, Gonzales 20, Semerad 14, Bolick 13, Herndon 9, Valdez 6, Alas 6, Marcelo 2, Bahio 0, Gamboa 0, Nieto 0.
Quarters: 30-32; 60-68; 96-112; 135-133
Second Game
MAGNOLIA 107 – Gomez de Liano 19, Alfaro 17, Lastimosa 16, Buffen 16, Andrada 11, Sangalang 7, Barroca 5, Koon 5, Taha 4, Dela Rosa 3, Jopia 2, Verano 2, Gomez 0, Laput 0.
RAIN OR SHINE 103 – Nocum 25, Fuller 18, Lemetti 11, Cuajao 9, Clarito 8, Malonzo 8, Caracut 8, Villegas 7, Santillan 4, David 3, Belga 2, Asistio 0.
Quarters: 32-26; 53-61; 86-81; 107-103