Naghain ng reklamo sa Department of Trade and Industry (DTI) ang 10 public health, child rights at tobacco control groups laban sa umano’y ilegal na pagpo-promote ng IQOS at ZYN sa Filipino Music Awards 2026 na ginanap sa SM Mall of Asia Arena noong October 6.
Pormal na inireklamo nitong Huwebes, October 22, ang Philip Morris International (PMI) at PMFTC dahil sa pagkakakilala sa dalawang tobacco at nicotine brands bilang co-presenters ng music awards.
Ayon sa mga grupo, posibleng lumabag ito sa Section 14(a) ng Republic Act No. 11900, na nagbabawal sa promotional sponsorship ng sporting events, concerts at cultural at artistic activities.
Kinuwestiyon din nila ang promotional materials na umano’y walang kinakailangang health warnings at age restrictions, gayundin ang collaboration ng IQOS sa Filipino artist na si Leeroy New.
Hiniling ng mga grupo sa DTI na imbestigahan ang mga alegasyon, maglabas ng preventive measure order, ipatanggal ang promotional materials at magpataw ng kaukulang parusa kung mapatutunayang may paglabag.
“The law is clear on restrictions against tobacco promotion and sponsorship. What needs to be established now is whether these restrictions were violated and, if so, who should be held accountable. Tobacco companies cannot be allowed to use entertainment platforms to circumvent public health safeguards,” ani HealthJustice Philippines Acting Executive Director Beverly Samson.
Kabilang sa mga nagreklamo ang Action on Smoking & Health Philippines, Child Rights Network, HealthJustice Philippines, Imagine Law, Parents Against Vape, Philippine Legislators’ Committee on Population and Development Foundation, Social Watch Philippines, Southeast Asia Tobacco Control Alliance, Philippine Smoke-Free Movement at Youth Against Vape.
Giit ni Philippine Legislators’ Committee on Population and Development Executive Director Au Quilala, hindi dapat malusutan ang mga restriksyon sa tobacco advertising at sponsorship sa pamamagitan ng malikhaing marketing arrangements.
“Congress did not establish restrictions on tobacco advertising and sponsorship only for these to be undermined through creative marketing arrangements,” ani Quilala.
Nagbabala rin si Philippine Smoke-Free Movement National Coordinator Rizza Duro sa pag-uugnay ng nicotine products sa musika, celebrities at entertainment.
“When tobacco brands associate themselves with music, celebrities, and entertainment, the concern goes beyond simple brand visibility,” ani Duro.
Ayon naman kay Parents Against Vape President Rebie Relator, dapat maprotektahan ang mga kabataan laban sa tobacco marketing habang nanonood ng entertainment events.
Batay sa 2024 Global Youth Tobacco Survey, 16.2 porsiyento ng mga estudyanteng Pinoy na edad 13 hanggang 15 ang gumagamit ng tobacco products, halos 30 porsiyentong pagtaas mula 2019.
Umabot din sa 23.6 porsiyento ang mga estudyanteng na-expose sa tobacco-branded merchandise, mas mataas ng 181 porsiyento sa loob ng limang taon.
Nananatiling alegasyon ang mga inireklamong paglabag habang hinihintay ang imbestigasyon at magiging pasya ng DTI. /Bistado