Balak magtayo ng $500 milyong electric vehicle (EV) manufacturing plant sa Pilipinas ang Vietnamese conglomerate na Vingroup, na may kapasidad na gumawa ng hanggang 200,000 sasakyan kada taon para sa lokal at export markets.
Ayon sa Department of Trade and Industry (DTI) nitong Miyerkules, October 21, target simulan ang konstruksiyon sa unang quarter ng 2027 at tapusin sa loob ng 12 hanggang 18 buwan.
Tinalakay ang proyekto sa pulong ng DTI at Vingroup Vice Chairman at GSM Global Chairman Nguyen Quoc Tuan.
Inalok ng pamahalaan ang mga posibleng tax incentives sa ilalim ng CREATE MORE Act at mas mabilis na permit processing sa Green Lane program.
“Vingroup’s USD 500 million investment underscores the Philippines’ rising status as Southeast Asia’s destination of choice for advanced manufacturing and green technology,” sabi ni Trade Secretary Cristina Roque.
Bukod sa four-wheeled EVs, plano rin ng Vingroup na magpasok ng electric scooters sa bansa.
May manufacturing operations na ang kumpanya sa Indonesia at India.
Gayunman, hindi pa tinutukoy ang lokasyon ng planta, bilang ng trabahong malilikha, export targets at mga modelong gagawin.
Hindi rin malinaw kung sasali ang Vingroup sa Electric Vehicle Incentive Strategy (EVIS) para sa karagdagang fiscal incentives.
Nakasalalay pa ang pagpapatupad ng proyekto sa mga susunod na kasunduan at investment arrangements. /Bistado