Bumaba ng 3.2 porsiyento sa P48.9 bilyon ang net income ng Bank of the Philippine Islands (BPI) sa unang siyam na buwan ng 2026 mula P50.5 bilyon noong nakaraang taon, matapos tumaas nang husto ang pondong inilaan para sa posibleng pagkalugi sa mga pautang at operating expenses.
Ayon sa Ayala-led bank nitong Huwebes, October 22, sumirit ng 69.2 porsiyento sa P19.9 bilyon ang credit-loss provisions mula P11.8 bilyon noong 2025.
Umakyat din sa 2.50 porsiyento mula 2.3 porsiyento ang nonperforming loan ratio, habang bumaba sa 89.6 porsiyento mula 96.5 porsiyento ang coverage ratio para sa problemadong pautang.
Sa kabila nito, lumago ng 9.8 porsiyento sa P156.3 bilyon ang revenues ng BPI, kabilang ang P121.1 bilyong net interest income at P35.2 bilyong non-interest income.
Tumaas naman ng 12.5 porsiyento sa P73.7 bilyon ang operating expenses.
Patuloy ding lumakas ang pagpapautang, na umakyat ng 13.6 porsiyento sa P2.7 trilyon.
Nanguna ang loans sa small and medium enterprises (SMEs), na lumago ng 46.7 porsiyento, kasunod ang credit-card loans na tumaas ng 27.2 porsiyento at personal loans na umakyat ng 21.7 porsiyento.
Sa unang anim na buwan ng taon, halos hindi gumalaw ang kita ng BPI sa P32.8 bilyon, bahagyang mas mababa ng 0.4 porsiyento. Lumaki ang pagbaba sa 3.2 porsiyento pagsapit ng September.
Sa pagtatapos ng ikatlong quarter, umabot sa P3.9 trilyon ang total assets ng bangko, mas mataas ng 10.8 porsiyento, habang lumago ng 11 porsiyento sa P3 trilyon ang deposits.
Bumaba rin sa 13.6 porsiyento mula 15 porsiyento ang return on equity, habang nanatiling matatag sa 14.7 porsiyento ang capital adequacy ratio, na higit sa regulatory requirements. /Bistado