Tinapos ng Barangay Ginebra ang eliminations sa ikatlong puwesto ng Group B matapos magwagi sa huling hamon nito sa PBA Season 50 Governors’ Cup sa Ynares Center Antipolo nitong Biyernes.
Pinatalsik ng Gin Kings ang Blackwater Bossing, 101-96, upang makumpleto ang uusad sa playoffs. Kasama sa mga koponang hindi na nakapasok ang Meralco Bolts.
Makakaharap ng Gin Kings ang San Miguel Beermen sa quarterfinals na best-of-five series.
Sa iba pang pares sa quarterfinals, magtatapat ang NLEX at Phoenix, Converge at Rain or Shine, at Magnolia at TNT.
Sisimulan ng top seeds na NLEX at Magnolia ang kanilang kampanya sa quarterfinals laban sa Phoenix at TNT, ayon sa pagkakasunod, sa Linggo sa Antipolo muli.
Sa Group A naman, nabigo rin umabante ang Terrafirma, Macau at Titan Ultra.
“First, let me say it was a tough group,” ani Ginebra coach Tim Cone.
“We had to work our way back and still made the playoffs as the third seed. It didn’t look that way early on, and we had to scratch and claw our way back. For that, I’m proud and pleased with our guys.”
Muntik nang hindi makapasok sa playoffs ang Gin Kings, pero nakabawi sila at nagtapos bilang third seed matapos manalo sa tatlo sa kanilang huling apat na laro.
Sapat na sana kahit matalo sila nang 23 puntos upang makapasok sa quarterfinals dahil sa mas magandang quotient.
Gayunman, hindi na nila kinailangang umasa rito dahil naipanalo nila ang laro sa lamang na limang puntos.
“By the third, we knew we had the quotient, but we still played well as we wanted to be ready for the playoffs,” ani Cone.
Nanguna si Jordan Murphy sa Gin Kings sa umiskor ng 22 puntos. Anim na manlalaro ng Ginebra ang nagtapos na may tig-10 puntos o higit pa.
Para sa Blackwater, nanguna sina Kentrell Barkley at Sedrick Barefield sa naiskor na 16 at 12 puntos, ayon sa pagkakasunod.
“Maganda ang depensa namin, start pa lang ng game. We made the stops to get the early lead, and we’re able to sustain the effort,” ani Troy Rosario, na nagtala ng 17 puntos.
Nagdagdag din sina RJ Abarrientos, Jonathan Grey, Scottie Thompson at Japeth Aguilar ng tig-10 puntos o higit pa.
Sa unang laro, dinomina ng Rain or Shine ang Phoenix Super LPG, 133-103, upang tapusin ang eliminations sa ikalawang puwesto ng Group B tangan ang 6-4 kartada.
Unang pagkakataon naman sa season-ending conference na nakapagtala si Jhonard Clarito ng double-double, matapos kumamada ng 18 puntos at 11 rebounds.
Nag-ambag si Adrian Nocum ng 17 puntos, habang nagtala rin si Mike Malonzo ng double-double na 13 puntos at 10 rebounds.
Lumamang ang Rain or Shine ng 29 puntos sa kabuuan ng second at third quarters, dahilan upang makabuo ito ng 110-84 na bentahe pagpasok ng fourth quarter.
“Before ‘yung laro, bilin ko lang, mas maganda kung mananalo tayo, pasok tayo ng quarterfinals, ng playoffs, on a winning note. That would be a good starting point for us,” ani Rain or Shine coach Yeng Guiao.
The scores:
First Game
RAIN OR SHINE 133 – Clarito 18, Fuller 18, Nocum 17, Malonzo 13, Santillan 13, Lemetti 11, Tiongson 10, Caracut 6, David 6, Cuajao 4, Asistio 4, Belga 3.
PHOENIX 103 – Earlington 20, Mamuyac 16, Escandor 16, Rivero 9, Tuffin 9, Chua 8, Ballungay 8, Santos 6, Cullar 5, Delos Santos 2, Ando 2, Tio 2.
Quarters: 27-30; 69-62; 110-84; 133-103
Second Game
GINEBRA 101 – Murphy 22, Rosario 17, Abarrientos 14, Gray 11, Thompson 10, J. Aguilar 10, Estil 8, Cu 7, Abis 2, Holt 0, Torres 0, Pinto 0, Go 0.
BLACKWATER 96 – Barkley 16, Barefield 12, Panopio 9, Murrell 9, Tratter 7, Una 7, Escoto 6, David 6, Ilagan 6, Mendoza 5, Demusis 3, Sena 3, Cruz-Dumont 3, DiGregorio 2, Austria 2.
Quarters: 33-19; 63-47; 87-72; 101-96