Mariing tinuligsa ng National Union of Students of the Philippines (NUSP) – Davao Chapter ang bagong labas na palisiya ng Commission on Higher Education (CHED) na nagpapahintulot ng 100 porsyentong online learning sa mga kolehiyo at unibersidad sa gitna ng krisis sa langis.
Sa ilalim ng CHED Memorandum No. 117, s. 2026, pinayagan ang mga Higher Education Institutions na magpatupad ng full online classes bilang tugon sa tumataas na presyo ng langis at epekto nito sa transportasyon at gastos ng mga estudyante.
Ayon sa CHED, layon ng hakbang na mabawasan ang gastusin sa biyahe at matulungan ang mga estudyante at guro habang umiiral ang energy crisis.
Pero para sa NUSP-Davao, hindi ito sagot sa problema. “𝐓𝐡𝐢𝐬 𝐩𝐨𝐥𝐢𝐜𝐲 𝐢𝐬 𝐧𝐨𝐭 𝐚 𝐬𝐨𝐥𝐮𝐭𝐢𝐨𝐧—𝐢𝐭 𝐢𝐬 𝐚 𝐬𝐮𝐫𝐫𝐞𝐧𝐝𝐞𝐫,” giit ng grupo.
Binigyang-diin nila na hindi pantay ang kakayahan ng mga estudyante na sumabay sa online setup, lalo na ang mga mula sa working-class at marginalized na sektor.
“There is no accessibility in a framework that assumes universal access to technology where none exists,” ayon sa kanilang pahayag.
Sa ilalim ng CHED Memo 117, nakasaad na ang implementasyon ay depende sa kakayahan ng paaralan at kahandaan ng mga estudyante. Ngunit ayon sa NUSP, dito pa lang ay malinaw na may malaking bahagi ng estudyante ang maiiwan.
Binalikan din ng grupo ang naging karanasan noong pandemya, kung saan bumaba ang kalidad ng edukasyon at dumami ang tumigil sa pag-aaral. Ipinunto ng group na sa Bangsamoro Autonomous Region in Muslim Mindanao, umabot umano sa 41 porsyento ang ibinaba ng enrollment. Dagdag pa, malaking bahagi ng mga estudyante sa modular at online learning ang nagsabing mas mababa ang kanilang natutunan kumpara sa face-to-face classes.
Sa buong bansa, milyon-milyong estudyante ang naapektuhan ng distance learning setup noong pandemya, ayon sa datos na binanggit ng grupo.
“𝐖𝐡𝐚𝐭 𝐢𝐬 𝐧𝐞𝐞𝐝𝐞𝐝 𝐢𝐬 𝐧𝐨𝐭 𝐝𝐢𝐠𝐢𝐭𝐚𝐥 𝐬𝐮𝐛𝐬𝐭𝐢𝐭𝐮𝐭𝐢𝐨𝐧, 𝐛𝐮𝐭 𝐬𝐭𝐫𝐮𝐜𝐭𝐮𝐫𝐚𝐥 𝐭𝐫𝐚𝐧𝐬𝐟𝐨𝐫𝐦𝐚𝐭𝐢𝐨𝐧,” diin ng NUSP-Davao.
Samanatala, nilinaw naman ng CHED na pansamantala lamang ang polisiya at hindi awtomatikong magreresulta sa permanenteng online degree programs, habang mananatili ang face-to-face sa mga kursong nangangailangan ng laboratory at praktikal na pagsasanay.
Pero para sa NUSP-Davao na ang edukasyon ay hindi dapat nakadepende sa kakayahang mag-online kundi dapat tiyaking abot ng lahat.
“Education must not be reduced to a matter of convenience or cost-efficiency… It is a right, a public good,” diin ng grupo. /Bistado