Hinadlangan ng De La Salle University ang outright twice-to-beat semifinal incentive ng defending champion National University matapos ang 16-25, 26-24, 20-25, 26-24, 17-15 panalo sa UAAP Season 88 men’s volleyball tournament noong Linggo sa Mall of Asia Arena.
Pinangunahan nina Chris Emmanuel Hernandez at Uriel Mendoza ang Green Spikers na may tig-17 puntos, habang nagtapos ang La Salle sa 5-9 win-loss slate. Ito ang unang pagkakataon mula Season 81 noong 2019 na hindi sila umabot sa Final Four.
Nag-ambag si Eugene Gloria ng 16 puntos, si Eric Paulo ng 11, habang sina Michael John Fortuna at Issa Ousseini ay may tig-pitong puntos.
Sa panig ng Bulldogs, nanguna si Leo Ordinales na may 28 puntos at si Jade Alex Disquitado na may 19. Nagdagdag si Michaelo Buddin ng 16 puntos at si Obed Mukaba ng 11 para sa NU na may 10-3 kartada.
Umabot sa dikitang laban ang fifth set. Matapos magtabla sa 14-all, inilamang ng La Salle ang 16-15 sa atake ni Hernandez. Sumunod ang crosscourt hit ni Buddin na unang tinawag na check ball, ngunit matagumpay na na-challenge ng La Salle bilang block touch para tuluyang maselyuhan ang panalo matapos ang dalawang oras at 12 minutong laro.
“We just want to finish our season well. Even though we said we wouldn’t make it [to the Final Four], we also wanted to show that this is La Salle. We had setbacks and encountered problems, but we see to it that we show who we really are,” ani La Salle coach Jose Roque.
Nagpahayag din ng determinasyon si Hernandez para sa susunod na season.
“For me, we’ll really persevere because we’ve been through a lot this season as a team. Next year, we’ll figure out how to manage it. We promise to do even better. We’ll really do better next season to get to the Final Four,” ani Hernandez, na may 19 excellent receptions at 12 digs.
Nag-orchestrate si Ezer Jake Regidor ng 29 excellent sets, habang nagtala ang rookie libero na si Sherwin Retiro ng siyam na receptions at pitong digs.
Sa kabila ng pagkatalo, may tsansa pa ang NU na makuha ang No. 2 seed kapag hinarap nito ang University of Santo Tomas na may 9-4 record sa Abril 22. Kapag nanalo ang UST at magtabla sa 10-4, magkakaroon ng playoff.
Samantala, nakalock na ang Far Eastern University sa No. 1 spot na may 12-1 record, habang hawak ng Ateneo ang No. 4 seed sa 7-6. /Bistado