Walang Pilipinong naiulat na nasaktan sa Riyadh, Saudi Arabia kasunod ng drone at ballistic missile attacks na inilunsad ng Houthi militants noong Biyernes at Sabado, ayon sa Department of Migrant Workers (DMW).
Sinabi ng DMW nitong Lunes, September 21, na patuloy nitong minomonitor ang kalagayan ng mga Pilipino sa Saudi Arabia sa pamamagitan ng Migrant Workers Offices (MWOs), katuwang ang Philippine Embassy at Consulate.
“The Department of Migrant Workers (DMW) is closely monitoring the situation of Filipinos in Saudi Arabia through the Migrant Workers Offices (MWOs) in the Kingdom of Saudi Arabia, in close coordination with the Philippine Embassy and Consulate,” saad ng DMW.
“The Embassy and Consulate are ready to assist overseas Filipino workers (OFWs) who may need help,” dagdag nito.
Ayon kay Houthi military spokesperson Yahya Saree, nagsagawa ang grupo noong Sabado ng military operations na “targeted sensitive sites in the Saudi capital, Riyadh, and the second targeted Aramco facilities in Yanbu.”
Sinabi niyang isinagawa ang mga pag-atake bilang pagganti sa mga naunang pag-atake sa Yemeni capital na Sanaa.
Samantala, sinabi ni Maj. Gen. Turki Al-Malkithe, official spokesperson ng Coalition to Restore Legitimacy in Yemen, na matagumpay na naharang at nawasak ng Royal Saudi Air Defense Forces ang isang ballistic missile na inilunsad patungong Riyadh madaling araw ng Sabado, September 19.
“The Royal Saudi Air Defense Forces successfully intercepted and destroyed a ballistic missile launched by the Terrorist Houthi Militia toward the city of Riyadh at dawn on Saturday, September 19, 2026,” saad niya.
Pinayuhan naman ng DMW ang mga Pilipino sa Saudi Arabia na manatiling alerto at sundin ang safety instructions at advisories ng Saudi authorities.
Para sa agarang tulong, pwedeng makipag-ugnayan ang overseas Filipino workers (OFWs) at kanilang pamilya sa DMW hotline 1348 kung nasa Metro Manila, 02 1348 kung nasa labas ng Metro Manila, at +632 1348 kung nasa ibang bansa.
Pwede ring tawagan ng OFWs sa Saudi Arabia si MWO Riyadh Labor Attaché Dominador Salanga sa +966502850944, MWO Jeddah Labor Attaché Fidel Macauyag sa +96569819720, o MWO Alkhobar Labor Attaché Sulaiman Mutya sa +966562329926.
“The DMW will continue to monitor developments and issue updates as information becomes available. OFWs requiring immediate assistance are advised to contact the appropriate MWO or the DMW hotlines listed above,” saad ng ahensya. /Bistado