Nagbukas na ang Season 57 ng Women’s National Collegiate Athletic Association (WNCAA) nitong Sabado sa Makati Coliseum.
Nakuha ng Centro Escolar University (CEU) ang 3×3 seniors title nang talunin ang San Beda College Alabang, 15-10.
Ang University of Makati (UMak), isa sa tatlong bagong kasapi, ang punong-abala sa una at nag-iisang tri-level league sa bansa para sa mga kababaihan.
Ang De La Salle-College of Saint Benilde Antipolo at University of the East Ramon Magsaysay ang dalawa pang bagong paaralan sa liga na may kabuuang 18 koponan.
Magsisimula ang volleyball tournament ngayong Linggo sa gym ng St. Scholastica’s College Manila.
Sa Setyembre 13 ang unang araw ng regular basketball sa gym ng Chiang Kai Shek College sa Maynila at futsal sa St. Paul College Pasig.
Ang iba pang mga event na nakatakda sa ikalawang semestre ay badminton, cheerdance at cheerleading, chess, softball, streetdance, swimming, table tennis at taekwondo (kyorugi at poomsae).
Taglay ng ika-57 season ang temang “Rise, Shine, Anywhere” upang higit na itaguyod ang layunin ng liga na palakasin ang women’s sports, at bigyang-diin ang talento, determinasyon at competitive spirit ng mga atleta nito.
“For decades, the WNCAA has served as a beacon for young female athletes across the nation,” ani Prof. Elyxzur Ramos, pangulo ng UMak. “We strongly believe that sports development is an essential pillar of holistic education.”
Sinabi ni WNCAA president Dr. Juanita Alamillo ng CEU na ipinapakita ng tema ngayong taon ang diwa ng mga babaeng atleta.
“Rise to face every challenge, overcome every setback and stand stronger after every defeat,” aniya.
Para kay Prof. Virgilio Tabbu, vice president for student affairs and community development ng UMAK, hindi lamang sa loob ng silid-aralan nagaganap ang edukasyon.
“Sometimes, it happens on the court, on the track, in defeat and when you are lost yet still choose to continue,” aniya.
Ang iba pang mga member school ay Assumption Antipolo, Assumption College, De La Salle Santiago Zobel, La Salle College Antipolo, Miriam College, Philippine Women’s University, St. Jude Catholic School, St. Stephen’s High School, University of Asia & the Pacific, at University of Santo Tomas-Angelicum College.