Itinakda na ng Senate impeachment court sa June 18 ang pre-trial conference sa impeachment case laban kay Vice President Sara Duterte, ayon kay House prosecutor at Bicol Saro Party-list Rep. Terry Ridon.
Ayon kay Ridon, ang Notice of Pre-Trial Conference ay inisyu noong June 9 at pirmado ni acting Senate President at Presiding Officer Sherwin Gatchalian.
Sa notice, inatasan si Duterte at ang House public prosecutors na humarap sa June 18, alas-9 ng umaga, sa Senator C.M. Recto Room sa Senado.
Sinabi ni Ridon na ito ang susunod na malaking hakbang sa impeachment proceedings dahil dito aayusin ang mga isyung lilitisin, ebidensyang ilalatag, witnesses na ihaharap, at timetable ng trial.
Ayon sa notice, maaaring dumalo ang mga partido nang personal o sa pamamagitan ng kanilang counsel.
Sakop ng pre-trial conference ang stipulation of facts, simplification of issues, marking ng documentary at real evidence, identification of witnesses, setting of trial dates, at proposed sequence sa presentation of evidence.
Tatalakayin din ang iba pang bagay na makatutulong para sa patas at mabilis na paglilitis.
Inatasan din ng impeachment court ang magkabilang panig na magsumite ng kanilang pre-trial briefs hanggang June 15.
Ayon sa notice, dapat laman ng pre-trial brief ang “a summary of admitted facts, proposed stipulations, and issues for resolution.”
Kailangan ding isama ang listahan ng documents, exhibits, at witnesses na kasalukuyang alam at reasonably available sa bawat panig.
Kung may ebidensya o witnesses na irereserba ang alinmang panig, kailangang ibunyag ang identity ng witnesses, ilarawan ang documentary o object evidence, at sabihin ang purpose ng presentation nito hindi bababa sa tatlong araw bago iharap sa impeachment court.
Pero para sa security at safety reasons, pinayagan ng impeachment court na itago muna ang identity at detalye ng ilang witnesses hanggang sa actual presentation, basta kasama ang mga ito sa total number of witnesses at corresponding trial dates na idineklara.
Hindi rin bukas sa media at publiko ang pre-trial conference.
“The Pre-Trial Conference proceedings shall not be open to the media or public,” ayon sa notice.
Nagbabala rin ang impeachment court na ang hindi paghahain ng pre-trial brief sa tamang oras, o hindi pagdalo sa pre-trial conference nang walang valid at legally justifiable reason, ay maaaring magresulta sa waiver ng karapatang magpresenta ng partikular na ebidensya o witnesses.
Kung may panig na hindi susunod sa requirements, maaaring bumuo ang impeachment court ng pre-trial order batay lamang sa mga available na records.
Ayon kay Ridon, inaasahang ilalatag ng June 18 conference ang framework ng impeachment trial sa pamamagitan ng pagtukoy sa mga napagkakasunduan, pinagtatalunan, ebidensya, mga saksi, at iskedyul ng proceedings. /Bistado