Dumating sa Senado si former Senator Antonio Trillanes IV nitong Lunes dala umano ang kopya ng arrest warrant ng International Criminal Court (ICC) laban kay Sen. Ronald “Bato” dela Rosa, ilang minuto matapos mapalitan si Senate President Vicente “Tito” Sotto III ni Sen. Alan Peter Cayetano.
Kasama ni Trillanes ang mga opisyal ng National Bureau of Investigation (NBI) nang magtungo siya sa Senado para umano’y isilbi ang ICC arrest warrant laban kay Dela Rosa.
Ipinakita ni Trillanes sa reporters ang kopya ng arrest warrant na aniya’y inisyu noong November 2025. Sinabi rin niyang na-transmit ito sa Philippine Center on Transnational Crime nitong Lunes matapos lumitaw si Dela Rosa sa Senado.
Si Dela Rosa ay bumalik sa Senate session ngayong Lunes sa unang pagkakataon mula nang sabihin ni Ombudsman Jesus Crispin Remulla noong November 2025 na nakakita siya ng ICC arrest warrant laban sa senador.
Sinabi ni Trillanes na maaaring arestuhin si Dela Rosa sa loob ng Senado kahit may session, gaya umano ng nangyari sa kanya noong 2018.
Sa hiwalay na ulat, may ilang senador na tumangging payagan ang grupo ni Trillanes na isilbi ang arrest warrant sa Senado.
Sinabi naman ni Dela Rosa nakipagbuno umano siya sa grupo ng NBI makapasok sa Senate session hall.
Si Dela Rosa, kasama si Sen. Christopher “Bong” Go, ay tinukoy sa mga nakaraang ulat bilang co-perpetrators umano ni former President Rodrigo Duterte kaugnay ng extrajudicial killings noong drug war.
Ang kilos ni Trillanes at ng NBI officials ay nangyari sa gitna ng matinding political developments sa Senado. Bago ito, napalitan si Sotto bilang Senate President matapos mahalal si Cayetano sa leadership change na nangyari sa session.
Ayon sa mga ulat, ang pagpalit ng liderato ay naganap habang papalapit ang posibleng impeachment trial ni Vice President Sara Duterte, sakaling maipadala ng House of Representatives ang Articles of Impeachment sa Senado. /Bistado