Binanatan ni Department of National Defense (DND) Secretary Gilberto Teodoro Jr. nitong Linggo ang Chinese Embassy sa Manila matapos nitong ibasura ang pahayag ng Department of Foreign Affairs (DFA) tungkol sa 2016 Arbitral Award.
Ayon kay Teodoro, ipinapakita ng tugon ng Chinese Embassy ang tunay na pakay ng Chinese Communist Party sa pakikitungo sa Pilipinas.
“The Chinese Embassy statement replying to our Department of Foreign Affairs is a window into the true intentions of the Chinese Communist Party in dealing with our country,” sabi ni Teodoro sa isang statement.
Noong nakaraang linggo, naglabas ng pahayag ang DFA na kumondena sa patuloy na pagtanggi ng China na kilalanin ang 2016 Arbitral Award, habang iginiit na final at binding ito.
Nauna nang sinabi ng Chinese Embassy sa Manila na nire-reject nito ang tinawag nitong South China Sea Arbitration at tinukoy ito bilang “a political manipulation in disguise.”
Inangkin din ng Chinese Embassy na ang Arbitral Award ay “distorted and abused” ang dispute-settlement mechanisms ng United Nations Convention on the Law of the Sea.
Pero para kay Teodoro, malinaw ang ipinapakita ng pahayag ng China.
“It clearly shows their insincerity and duplicity which are amply personified by their Embassy officials. We condemn the arrogant display of deceitful indignation by them,” sabi niya.
“Hindi kapanipaniwala ang mga sinasabi kaya idinadaan sa alboroto.”
Sa kabila nito, sinabi ni Teodoro na hindi magpapasindak ang Pilipinas sa ganitong mga hakbang.
“Hindi tayo pasisiil,” dagdag niya. /Bistado