Tinawag na “makapal ang mukha” ni House prosecutor Terry Ridon ang mga opisyal ng Office of the Vice President at Department of Education dahil sa umano’y paghingi ng mas magaang audit action mula sa Commission on Audit (COA).
“Medyo makapal ang mukha ng mga involved doon sa OVP at Department of Education to even ask an audit query from the Commission on Audit,” ani Ridon matapos ang Senate impeachment trial nitong Martes.
Ayon sa Bicol Saro Party-list representative, COA lamang ang may awtoridad na magpasya kung anong audit document ang ilalabas sa isang ahensiya.
“It is not subject to a request. It is not subject to a favor by any other agency,” giit niya.
Sa paglilitis, inilahad ng witness na si former state auditor Roderick Wamil na nakipagpulong noong September 2023 sina OVP Chief of Staff Atty. Zuleika Lopez at noo’y DepEd chief of staff at spokesperson na si Atty. Michael Poa sa mga opisyal ng COA.
Miyembro na ngayon ng defense team ni Duterte si Poa.
Dumalo rin umano sa pulong sina COA Assistant Commissioner at Intelligence and Confidential Funds Audit Office head Nilda Plaras at audit team head Gloria Camora.
Ayon kay Wamil, nagtanong sina Lopez at Poa tungkol sa liquidation process at mga supporting document na kailangan para sa confidential funds ng OVP at DepEd. Itinuro sa kanila ang Joint Circular No. 2015-01, na namamahala sa paglalabas, paggamit at audit ng confidential at intelligence funds.
Ipinaliwanag umano ni Plaras na maglalabas ang COA ng Audit Observation Memorandum kung makakita ang mga auditor ng deficiencies. Tinanong umano nina Lopez at Poa kung maaaring audit query na lamang ang ilabas.
“Wala po sa lugar para magkaroon ng pagpupulong at makiusap at magsabi na imbes na AOM ang i-issue, audit query na lang po ang i-issue,” ani Ridon.
“They tried to influence the agency. Instead of issuing an Audit Observation Memorandum for both the OVP and the Department of Education, they wanted a slap on the wrist, an audit query memorandum lang po,” dagdag niya.
Tumestigo si Wamil na hindi pamilyar sa audit query dahil wala ito sa mga audit action sa joint circular. Tinanggihan ng ICFAO ang hiling at kalauna’y naglabas ng mga AOM matapos makakita ng deficiencies sa isinumiteng dokumento ng dalawang ahensiya.
“The meeting itself is actually irregular. It was improper. It should not have happened,” ani Ridon.
Saklaw ng audit ang P612.5 milyong confidential funds—P500 milyon sa OVP at P112.5 milyon sa DepEd noong Education secretary si Duterte. /Bistado