Mahigit P43 million halaga ng hinihinalang smuggled cigarettes ang nasamsam ng Philippine National Police (PNP) sa magkahiwalay na operasyon sa Negros Oriental at Pagadian City noong May 16 at 17, 2026.
Ayon sa PNP, 11 suspects ang naaresto sa dalawang operasyon habang pinaiigting ng pulisya ang kampanya laban sa smuggling.
Sa Basay, Negros Oriental, nasabat ng local police units, maritime personnel, at partner law enforcement agencies ang nasa 700 master cases ng suspected smuggled cigarettes na nagkakahalaga ng humigit-kumulang P40.1 million.
Narekober din ng mga awtoridad ang isang motorized boat na pinaniniwalaang ginamit sa transportasyon ng mga kontrabando.
Sampung indibidwal ang dinala sa kustodiya para sa kaukulang legal proceedings.
Sa hiwalay na operasyon sa Pagadian City, Zamboanga del Sur, isang suspect naman ang naaresto matapos makumpiska ng police operatives ang 57 master cases ng suspected smuggled cigarettes.
Tinatayang higit P3.2 million ang halaga ng nasabat sa Pagadian operation.
Pinuri ni PNP Chief Police General Jose Melencio C. Nartatez Jr. ang operating units sa koordinadong operasyon laban sa smuggling.
“Bahagi ito ng mas malawak nating tungkulin na protektahan ang ekonomiya at tiyakin na umiiral ang batas sa maayos na paraan. Patuloy nating paiigtingin ang ating kampanya laban sa mga iligal na aktibidad habang iginagalang ang karapatan ng bawat isa,” ani Nartatez. /Bistado