Bawal munang sumali sa kahit anong kaganapan ng University Athletic Association of the Philippines (UAAP) ang lahat ng miyembro ng coaching staff ng Ateneo de Manila University na kasama sa team building sa Dipaculao, Aurora noong Hunyo 8, kung kailan nalunod ang mga manlalaro ng men’s basketball na sina Rene Baterbonia at Divine Adili.
Hindi tinukoy ng UAAP kung sino-sino sa mga coach ang pagbabawalang lumahok, ngunit ang mga na-ulat na nasa Dipaculao ay sina dating head coach Tab Baldwin at mga assistant na sina Dean Castaño, Jon Jacinto, at Sandro Soriano.
Nagbitiw na sa puwesto si Baldwin, gayundin ang team manager na si Epok Quimpo.
Sa isang pahayag nitong Biyernes, sinabi ng UAAP na epektibo agad ang naturang parusa.
“As such, they are prohibited from participating in any UAAP-related activities, in any capacity, effective immediately and while these investigations are being conducted,” ayon sa pahayag ng UAAP.
“This preemptive measure, adopted even prior to the UAAP season, is intended to preserve the integrity of the ongoing inquiry and to ensure full transparency and due process as facts surrounding the incident are being carefully examined.”
Tinangay ng malalakas na alon ng Pacific Ocean sina Baterbonia, 18, at Adili, 21, na naging sanhi ng kanilang pagkamatay.
Binigyan ng UAAP ang unibersidad hanggang Hulyo 15 upang makumpleto ang kanilang imbestigasyon.
Maglalabas ang liga ng pinal na pasya matapos ma-isumite ng Ateneo ang resulta.
“Amidst differing and clashing perceptions on this tragic incident, the UAAP, as a collegial body, is committed to adhere to its own governing rules and processes, where the acts of a member-university and personalities involved will be thoroughly evaluated by the other member schools before passing judgment,” pahayag ng UAAP.
“The UAAP reiterates that accountability shall be determined based on the results of a thorough and impartial investigation and its fidelity to its own rules and regulations. All those found responsible for any wrongdoing shall be held fully accountable under league regulations.”
Isa sa mga posibleng parusang maaaring ipataw ay ang pagbabawal sa buong season sa lahat ng sports.
Samantala, iba-iba ang salaysay ng mga manlalaro at coaching staff sa pag-iimbestiga ng Philippine National Police-Criminal Investigation and Detection Group (PNP-CIDG), ayon kay Interior Secretary Jonvic Remulla.
Ito ay matapos humarap sina Baldwin, Castaño at athletics director na si Em Fernandez sa CIDG sa Camp Crame sa Quezon City nitong Biyernes ng umaga.
“They gave their knowledge of the events. There are some inconsistencies between what the players and what the coaches said, pero hindi pa kami tapos (but we are not done yet),” kwento ni Remulla sa mga mamamahayag.
“Iba ‘yung vantage point. ‘Yung mga players, nasa dagat. ‘Yung coaches, nasa pampang. Kinukuha lang namin ‘yung full details tapos gagawa kami ng conclusive report (They had different vantage points. The players were in the sea, the coaches were on the shore. We’ll get the full details, then we’ll make a conclusive report),” dagdag nya.
Sinabi ni Remulla na nagsilbi na rin ng subpoena ang CIDG kay Ateneo de Manila president Fr. Roberto Yap, SJ, para sa pagpapatuloy ng kanilang fact-finding probe sa susunod na Huwebes.
Hindi pa personal na humaharap sa CIDG si Quimpo.