Pito sa bawat 10 adult na Pinoy ang naniniwalang dapat batas at ebidensya, hindi konsiderasyong pampulitika, ang dapat maging pangunahing batayan ng mga senador sa paghatol sa impeachment case ni Vice President Sara Duterte.
Sa survey ng OCTA Research, 71 porsiyento ang nagsabing dapat gabayan ang desisyon ng Senado ng batas at mga ebidensyang ilalahad sa paglilitis. Samantala, 21 porsiyento ang naniniwalang dapat mas manaig ang political considerations.
Ipinakikita ng resulta ang mataas na pagpapahalaga ng publiko sa due process at pag-asang gagampanan ng mga senator-judge nang patas ang kanilang tungkulin sa ilalim ng Konstitusyon.
Hindi lamang sa isang lugar o sektor namayani ang panawagan para sa evidence-based decision. Nanguna rin ang ganitong pananaw sa apat na pangunahing geographic area ng bansa, lahat ng socioeconomic class at malalaking demographic group na sinaklaw ng survey.
Bagaman magkakaiba ang antas ng suporta sa bawat rehiyon at pangkat, nanatiling dominante sa buong bansa ang paniniwalang batas at ebidensya ang dapat pairalin.
Ipinahihiwatig din ng survey na nakikilala ng maraming Pilipino ang impeachment bilang prosesong may political context. Gayunman, inaasahan pa rin nilang constitutional at legal standards, sa halip na partisan interests, ang magiging batayan ng magiging hatol.
Isinagawa ang survey mula July 4 hanggang 11, 2026, sa panimulang yugto ng Senate impeachment proceedings at bago ganap na mailatag ang lahat ng ebidensya.
Dahil dito, maaaring magsilbing baseline ang findings sa pagsukat ng tiwala ng publiko habang umuusad ang paglilitis. Maaaring suriin sa mga susunod na survey kung tataas o bababa ang kumpiyansa ng mga Pilipino sa proseso matapos marinig ang mga testigo at masuri ang mga dokumento ng magkabilang panig.
Ipinakikita rin ng resulta na lampas sa magiging hatol kay Duterte ang inaasahan ng publiko. Nais ng mga respondent na mapangalagaan ang institutional fairness, due process at pagdedesisyong nakabatay sa ebidensya, anuman ang kalabasan ng kaso.
Isinagawa ang survey sa pamamagitan ng face-to-face interviews sa 1,200 probability respondents na edad 18 pataas.
Mayroon itong ±3 porsiyentong margin of error sa 95 porsiyentong confidence level. Ang subnational estimates para sa National Capital Region, Balance Luzon, Visayas at Mindanao ay may tig-±6 porsiyentong margin of error sa kaparehong confidence level. /Bistado