Umabot sa 260 residente mula sa 63 pamilya ang nailikas ng Philippine Coast Guard (PCG) sa magkakahiwalay na rescue operation sa Sarangani, Guimaras at Antique matapos lumubog sa baha ang ilang komunidad dahil sa tuloy-tuloy na malakas na ulan.
Pinakamaraming inilikas sa Purok Riverside, Barangay Kablacan sa Maasim, Sarangani noong Huwebes, July 23.
Nalaman at napatunayan ng PCG ang sitwasyon matapos mamonitor ang Facebook Live ng isang concerned citizen. Agad na nagtungo sa lugar ang Coast Guard Disaster Response Group at tinulungan ang mga residenteng nanganganib sa patuloy na pagtaas ng tubig.
Humigit-kumulang 60 pamilya o 240 indibidwal ang ligtas na dinala sa mas ligtas na lugar. Walang naiulat na nasawi o nasugatan sa insidente.
Nagpadala rin ang Coast Guard Sub-Station (CGSS) Colon ng mga tauhan sa Kumaba Bridge sa Barangay Kanalo. Pansamantalang hindi madaanan ang tulay dahil sa malakas na pag-ulan at pagtaas ng tubig.
Nananatiling nakaantabay ang mga tauhan ng CGSS Colon para sa karagdagang evacuation assistance at patuloy na minomonitor ang mga apektadong komunidad.
Bahagi ang operasyon ng Intensified Community Assistance, Awareness, Response and Enforcement campaign ng PCG, na nakatuon sa pagpapalakas ng pagtugon at serbisyo sa mga komunidad tuwing may sakuna.
Samantala, 20 residente mula sa tatlong pamilya ang sinagip ng PCG sa magkahiwalay na operasyon sa Guimaras at Antique nitong Biyernes, July 24.
Sa Sitio Nabagatan, Barangay Poblacion sa Jordan, Guimaras, isang pamilyang binubuo ng 10 katao ang na-trap matapos mabilis na tumaas ang baha. Agad silang sinagip ng mga tauhan ng PCG.
Sa hangganan naman ng Barangay Guintas at Barangay Funda sa Hamtic, Antique, dalawang pamilya na may kabuuang 10 miyembro ang na-stranded nang putulin ng mabilis na pagtaas ng tubig ang kanilang mga evacuation route.
Sa kabuuan, 240 katao ang nailikas sa Sarangani at tig-10 naman sa Guimaras at Antique habang nagpapatuloy ang pagbabantay sa mga lugar na apektado ng pagbaha. /Bistado