NEPAL – Umabot na sa hindi bababa sa 160 katao ang nasawi habang daan-daan pa ang nawawala matapos rumagasa ang dambuhalang flash floods sa border area ng Nepal at China nitong Miyerkules.
Sa Nepal, hindi bababa sa 157 ang kumpirmadong patay. Tatlo naman ang naiulat na nasawi sa Tibet region ng China, kung saan 265 katao ang nawawala sa Gyirong County malapit sa border.
Ayon sa mga eksperto, isang glacial collapse sa Himalayan region ang nagpasimula ng disaster. Tinangay ng rumaragasang tubig ang mga komunidad, sinira ang mga kalsada at tulay, at nagbaon sa putik at debris ng mga bahay at sasakyan.
Sa Nepal lamang, 403 katao ang naiulat na nawawala, kabilang ang 341 foreigners. Kabilang dito ang 133 Indian nationals na patungo sa pilgrimage sa Mount Kailash sa Tibet, gayundin ang 47 Americans, 34 Australians, 33 British nationals, at 24 Canadians.
Hindi bababa sa 28 police officials sa Nepal ang nawawala rin.
Tinangay ng baha ang hindi bababa sa 19 bridges at halos 40 kilometers ng kalsada. Nasira rin ang ilang villages at hydropower projects matapos umapaw ang Bhotekoshi River.
Humingi na ang Nepal ng tulong mula sa India at China para sa nagpapatuloy na rescue operations.
Nauna munang iniulat ng U.S. Geological Survey ang magnitude 4.4 earthquake malapit sa border, pero kalaunan ay binago nito ang assessment. Ayon sa USGS, hindi lindol ang nangyari kundi magnitude 5.2 glacial collapse na nagpadala ng debris pababa at nagdulot ng catastrophic impact sa mga komunidad.
Sinabi naman ng climate experts mula sa Kathmandu-based International Centre for Integrated Mountain Development na posibleng avalanche mula sa glacier ang nag-trigger ng flash flood.
Sa isang bahagi ng Trishuli River, umakyat nang hanggang siyam na metro ang water level sa loob lamang ng kalahating oras.
Nakaranas na rin ang rehiyon ng kahalintulad na flash flood noong August 2025 nang umapaw ang isang glacial lake sa Tibet dahil sa mataas na temperatura. Siyam ang nasawi noon at nasira ang critical infrastructure, kabilang ang tulay na nag-uugnay sa Nepal at China.
Ayon sa climate researchers, lalong mabilis ang pagkatunaw ng glaciers sa Hindu Kush Himalaya region, kung saan dumoble ang ice-loss rate mula noong 2000. Nagiging mas madalas din ang extreme weather events, kabilang ang matinding monsoon rains at glacier melting, habang umiinit ang klima. /Bistado