Kabilang si Vice President Sara Duterte sa mga pinanagot ng Commission on Audit (COA) kaugnay ng ₱73.287 milyong disallowed confidential fund expenses ng Office of the Vice President (OVP) noong December 2022.
Ito ang sinabi nitong Martes ni Xylene Mae del Campo, supervising auditor ng COA-Intelligence and Confidential Funds Audit Office (COA-ICFAO), sa pagpapatuloy ng impeachment trial sa Senado.
Ayon kay Del Campo, naglabas ang COA ng Notice of Disallowance dahil hindi nakapagpakita ang OVP ng sapat na proof of success sa information-gathering at surveillance activities—isang requirement bago magbayad ng rewards mula sa confidential funds.
Nagsumite umano ang OVP ng listahan ng 105 aktibidad, ngunit walang tinukoy na accomplishment na magpapatunay sa tagumpay ng mga confidential operation.
“Based po sa document na ‘to, hindi po napakita dito na ‘yung proof of success of the information gathering. At may mga activities din dito na from Dec. 13, 15, 17, 18 na hindi sakop doon sa period of utilization nung (Based on this document, the proof of success on the information gathering could not be shown. And there are activities here, from Dec. 13, 15, 17, 18, that was not covered under the period of utilization of the) cash advance, which is for Dec. 21 to 31, 2022,” ani Del Campo.
Sa ilalim ng Joint Circular No. 2015-01, dapat aprubado ng agency head ang paggamit ng pondo, suportado ng dokumentong nagpapatunay sa matagumpay na information-gathering o surveillance, at direktang konektado sa confidential activities ng ahensiya.
Kabilang sa mga aktibidad na iniharap ng prosecution mula sa OVP submissions ang appreciation night kasama ang Department of Education partners at Christmas activities kasama ang transportation network vehicle service, tricycle operators and drivers association, Angkas at food-delivery drivers, pati persons with disabilities.
Sinabi rin ni Del Campo na ₱69.78 milyon ang disallowed dahil ginamit umano sa pagbili ng mga mesa, upuan, desktop computer at printer nang walang paliwanag kung paano nauugnay ang mga ito sa confidential activities. Wala rin umanong official receipts o sales invoices.
Unang nakalista bilang liable si Duterte dahil siya ang agency head at nag-apruba sa mga transaksiyon, kabilang ang paggamit ng cash advances.
Kasama rin sa pinanagot sina Special Disbursing Officer Gina Acosta, na payee ng mga tseke at nag-disburse ng cash advances, at OVP chief accountant Julieta Villadelrey, na nag-certify na kumpleto at maayos ang supporting documents.
Inaprubahan ni COA Assistant Commissioner Nilda Plaras ang draft Notice of Disallowance ni Del Campo.
Naghain ang OVP ng petition for review noong February 5, 2025, ngunit pinagtibay ng COA proper noong April 10 ang disallowance at demand na isauli ang ₱73.287 milyon. Nakabinbin pa ang motion for reconsideration ng OVP. /Bistado