Wagi ang TNT kontra Barangay Ginebra sa huling tatlong paghaharap nila para sa kampeonato.
Sa muling duwelo laban sa Tropang 5G para sa korona ng PBA Season 50 Commissioner’s Cup simula ngayong Miyerkules, hangad ng Gin Kings na sulitin ang pagkakataong makabawi sa kanilang talo sa Season 49 Commissioner’s Cup at Seasons 47 at 49 Governors’ Cup.
“I think both teams are deserving to be here but one’s going to come out on top. Sometimes, it’s not always, you know, it’s not fun being the second-placed team. So, you know, we’re going to both battle for that first place. So, looking forward to Wednesday,” ani coach Tim Cone.
Magsisimula ang best-of-series sa ganap na 7:30 p.m. sa Smart Araneta Coliseum Quezon City.
Masakit para sa Ginebra ang pagkatalo nito sa TNT noong nakaraang Commissioner’s Cup dahil nasayang ang 3-2 kalamangan sa serye at natalo sila sa Game 7 sa overtime, 87-83.
“Ite-take namin yan as motivation coming to this series,” ani Scottie Thompson. “Marami kaming lessons from that loss na dadalhin namin to this series, especially on the defensive end. Against TNT, kailangan ‘yung defense mo from start to finish, consistent.”
Layunin din ng Ginebra na wakasan ang pitong kumperensiyang tagtuyot sa kampeonato.
Huling nagkampeon ang Gin Kings sa Season 47 Commissioner’s Cup, kung saan tinalo nila ang guest team na Bay Area Dragons, 114-99, sa Game 7 sa harap ng rekord na 54,589 manonood sa Philippine Arena sa Bulacan.
Samantala, matapos ang dikit na 97-94 panalo ng Tropang 5G laban sa Meralco sa Ynares Sports Center sa Antipolo noong Linggo para makarating sa finals, kinilala ni TNT coach Chot Reyes ang lakas ng Barangay Ginebra na naunang umabante sa kampeonato matapos talunin ang Rain Or Shine.
“We’re coming in as huge underdogs playing the national team. We’re playing Gilas and the reigning GOAT (Greatest of All Time) import of the PBA,” pahayag ni Reyes tungkol sa mga nationals sa Gin Kings at kay Justin Brownlee.
Dahil nakatakda ang Game 1 sa Miyerkules, umaasa lamang si Reyes na magkakaroon ng sapat na pahinga ang TNT bago ang panibagong laban kay Cone.
“We hope that we get a lot of good rest and recovery to prepare for that game and series. Getting to the finals is hard. It’s very hard but now that we’re here, we shouldn’t be content,” ani Reyes.