Naghain si Sen. Erwin Tulfo ng complaint for grave oral defamation laban sa tatlong dating bodyguards ni dating Ako Bicol party-list Rep. Zaldy Co matapos siyang iugnay sa umano’y cash deliveries at human trafficking activities sa June 4 proceeding sa Senado.
Sa 13-page complaint-affidavit na inihain nitong Monday sa Pasay City Prosecutor’s Office, hiniling ni Tulfo na kasuhan sina Bernard Gumban, Rosebert Waupan, at Benny Bulontate ng grave oral defamation sa ilalim ng Article 358 ng Revised Penal Code, in relation to Section 6 ng Republic Act 10175, o Cybercrime Prevention Act of 2012.
Ayon kay Tulfo, ginawa ng respondents ang mga pahayag sa tinawag niyang irregular Senate proceeding na na-stream live sa social media at lumaganap pa sa news reports, interviews, at online commentaries.
Sinabi niya na ginanap ang June 4 activity kahit may prior notice na nagpo-postpone at nagre-reset ng Blue Ribbon committee hearing sa ibang petsa. Nangyari rin ito matapos ang June 3 shift sa Senate majority leadership at ang eleksyon ng bagong committee chairperson.
Sa complaint, sinabi ni Tulfo na inakusahan siya ni Gumban na tumanggap umano ng luggage na may milyun-milyong pisong cash.
“These malicious accusations against my person was elicited through the questioning of former SP (Senate President) Alan Cayetano on why the name of Senator Erwin Tulfo was included in the Complaint-Affidavit,” ani Tulfo.
Mariin niyang itinanggi na tumanggap siya ng ilegal na pera mula kay Co o kaninuman.
“I have never authorized, facilitated, or benefited from any flood-control project or from any illegal transaction,” saad ni Tulfo.
Tinawag niya ang mga alegasyon na “fantastic and outright lies.”
Ayon kay Tulfo, hindi umano masabi ni Gumban nang malinaw ang specific address ng sinasabing bahay niya sa Greenhills. Sinabi rin niya na hindi tugma ang detalye tungkol sa laki ng luggage at halaga ng perang sinasabing laman nito.
Giit ni Tulfo, nagdulot sa kanya ang mga akusasyon ng “public ridicule, contempt, scorn, suspicion, and humiliation” at sinira ang kanyang reputasyon bilang senador, public servant, broadcaster, at family man.
Kasama rin sa complaint ang mga pahayag umano nina Waupan at Bulontate, na ayon kay Tulfo ay nag-uugnay sa kanya sa human trafficking-related activities kung saan may mga babae umanong dinadala sa kanya sa mga hotel.
Itinanggi rin ito ni Tulfo at tinawag na baseless at malicious ang mga pahayag.
“I vehemently deny that such engagements ever occurred and took place at any given time and on any of those mentioned places,” ani Tulfo.
Ayon pa sa senador, hindi dapat gawing panangga ng respondents ang privilege o immunity dahil ang June 4 proceeding ay hindi umano duly constituted Blue Ribbon committee hearing at ginawa sa labas ng proper legislative processes.
Sinabi rin niya na ginawa ang mga pahayag habang nakabinbin ang sariling submissions ng mga respondent sa Office of the Ombudsman, kung saan maaari sanang masuri ang mga alegasyon sa tamang legal process.
Giit ni Tulfo, ang public airing ng mga alegasyon ay nagdulot ng substantial injustice sa kanyang reputasyon at standing sa komunidad. /Bistado