Pitong natatanging atleta na humubog sa kasaysayan ng palakasan ng bansa ang pinarangalan sa 5th Philippine Sports Hall of Fame Enshrinement Ceremony na ginanap sa bagong anyong PSC (Philippines Sports Commission) House sa loob ng Rizal Memorial Sports Complex sa Malate, Maynila noong Sabado, June 20.
Ipinagdiwang ng gabi sina Ramon Fernandez, Mansueto “Onyok” Velasco, Isidro del Prado, Adeline Dumapong, Cecil Mamiit, Bea Lucero-Lhuillier at ang yumaong si Eduardo “Eddie” Pacheco.
Bagama’t nagmula sila sa iba’t ibang disiplina, pinag-isa sila ng kanilang pangmatagalang ambag sa palakasan ng Pilipinas.
Mula sa dominasyon ni Fernandez sa basketball court, pilak na medalya ni Velasco sa 1996 Atlanta Olympics sa boxing, at mga rekord ni del Prado sa sprinting, hanggang sa makasaysayang Paralympic medal ni Dumapong, tagumpay ni Mamiit sa internasyonal na tennis, husay ni Lucero-Lhuillier sa dalawang isport (gymnastics at taekwondo), at pambihirang kakayahan ni Pacheco sa football at basketball, ang mga itinanghal ay sumasalamin sa tibay, sakripisyo, at tagumpay ng atletang Pilipino.
Naging bahagi rin ng seremonya ang pagbubukas ng PSC House, na binago mula sa isang lumang gusali tungo sa isang makabagong sentro para sa pamamahala at pamana ng palakasan.
“Your achievements have transformed the national imagination,’’ ani PSC Chairperson Patrick Gregorio sa pitong enshrinees.
“‘In the same spirit, we seek to do more than create beautiful spaces, we want to continue the work of transforming hearts and minds,’’ dagdag pa ni Gregorio, na namumuno rin sa Philippine Sports Hall of Fame.
Binigyang-diin ni Gregorio na ang pagsasaayos ng gusali ay higit pa sa imprastraktura. Isa itong pagpupugay sa mga atleta at sa mga pamana na kanilang nililikha.
“Sa gitna ng lahat ng gulo sa bansa at sa mundo, it is this spirit of transformation that allows us to keep hoping. Let us honor legacy not only by remembering it, but by living it. We are very proud of you, honorees. Salamat sa inyo. Salamat sa paglaban,’’ ani Gregorio.
“Salamat sa hindi pagsuko. Salamat sa puso at alab. Just like the flag that you have worn so proudly, kayo ang maningning na mga bituin at araw ng bayang Pilipinas kailan pa ma’y di magdidilim. Mabuhay ang atletang Pilipino.”
Binigyang-diin din ng PSC Chair ang patuloy na pagbabago sa ahensiya, partikular ang pagtatatag ng mga Regional Training Center sa iba’t ibang bahagi ng bansa upang ma-ilapit ang mga oportunidad sa mga kabataang atleta.
“We are changing the narrative. For too long, our system told young athletes from the provinces: Kung gusto mong sumikat, lumuwas ka ng Maynila. Those days are over. We are doing this because we know the future is at the grassroots,” ani Gregorio.
Nakibahagi rin sa pagdiriwang ang ilan sa mga pangulo ng national sports associations na kumakatawan sa mga isport ng mga pinarangalang atleta, na nagpapakita ng mahalagang papel ng mga institusyon sa kanilang mga tagumpay.
Dumalo sa makasaysayang okasyon sina Philippine Athletics Track and Field Association president Terry Capistrano, Philippine Football Federation president John Gutierrez, Samahang Basketbol ng Pilipinas president Ricky Vargas, Association of Boxing Alliances in the Philippines president Marcus Manalo, at Philippine Tennis Association secretary general John Rey Tiangco.
Kasama ni Gregorio sa pitong-kataong selection committee sina Games and Amusement Board Chair Francisco Rivera, Pilipinas Curling Federation secretary general Jarryd Bello, at Vovinam Federation of the Philippines secretary general Jose Malonzo.
Kinumpleto naman ang komite nina Philippine Olympic Committee president Abraham Tolentino, Xavier Virata ng Ayala Foundation, at MVP Sports Foundation president Al Panlilio.
Ang limang-kataong Review and Evaluation Committee ay binubuo ng mga beteranong mamamahayag sa larangan ng palakasan na sina Quinito Henson, Al Mendoza, Ignacio Dee, Jun Lomibao at Dodo Catacutan.
Gaya ng sinabi ni Gregorio, ang misyon ng PSC ay hindi lamang panatilihin ang alaala ng nakaraan kundi paunlarin ito, upang matiyak na ang susunod na henerasyon ng mga atletang Pilipino ay magkakaroon ng pagkakataong mangarap, magsikap, at magtagumpay.
Nagtapos ang seremonya sa isang standing ovation habang pinarangalan ang mga nagwagi bilang “shining stars and sun of the Philippine flag never to dim.”
Tatanggapin ng Philippine Sports Hall of Fame ang susunod nitong hanay ng mga bayaning atleta ng Pilipinas sa Mayo 2028.