Bumagsak sa $100 bilyon ang gross international reserves (GIR) ng Pilipinas noong September, pinakamababang antas sa loob ng tatlong taon, ayon sa Bangko Sentral ng Pilipinas (BSP).
Mula $104.8 bilyon noong August, lumiit ang reserves dahil sa net foreign exchange operations ng BSP, pagbaba ng valuation ng gold holdings at foreign currency-denominated reserve assets, at withdrawals ng national government para sa foreign debt payments at iba pang pangangailangan.
Bumaba rin ang foreign investments ng BSP sa $76.47 bilyon mula $79.78 bilyon, habang lumiit ang gold holdings sa $17.82 bilyon mula $19.11 bilyon.
Sa kabila nito, sinabi ng BSP na sapat pa rin ang reserves at “provides sufficient foreign currency to meet the country’s import needs, service its external debt obligations, and serve as a buffer against external economic shocks.”
Katumbas ang September GIR ng 6.3 buwang imports ng goods at payments para sa services at primary income.
Kaya rin nitong sagutin ang humigit-kumulang 3.2 beses ng short-term external debt ng bansa batay sa residual maturity.
Binubuo ang GIR ng foreign securities, currency at deposits, gold, special drawing rights, reserve position sa International Monetary Fund at iba pang reserve assets na hawak ng BSP. /Bistado