PAMPANGA – Dalawang indibidwal ang naaresto matapos salakayin ng Philippine National Police (PNP), Food and Drug Administration (FDA), at National Meat Inspection Service (NMIS) ang isang meat processing facility sa Bacolor, Pampanga na umano’y walang License to Operate.
Nasabat sa operasyon ang humigit-kumulang 40 tonelada ng assorted frozen beef, pork, at chicken products na tinatayang nagkakahalaga ng P4.5 million.
Ayon sa PNP, isinagawa ang operasyon mula June 18 hanggang June 19, 2026 sa Barangay Calibutbut ng Regional Special Operations Group ng Regional Intelligence Division 3 ng Police Regional Office 3.
Katuwang sa operasyon ang FDA Regional Field Office 3, NMIS Region 3, mga kinauukulang tanggapan ng Bacolor Municipal Government, at Bacolor Municipal Police Station.
Inaresto ang registered owner at production manager ng establisyimento dahil sa umano’y paglabag sa Republic Act No. 10611, o Food Safety Act of 2013, at Republic Act No. 9296, o Meat Inspection Code of the Philippines, as amended.
Batay sa initial findings, may ilang meat products na expired na at umano’y nire-repackage o nire-recycle para muling ipamahagi.
Ayon sa mga awtoridad, maaaring magdulot ng panganib sa kalusugan ng consumers ang mga produkto.
Pansamantalang ipinasara ang facility habang nagpapatuloy ang imbestigasyon at kaukulang aksyon ng concerned government agencies.
Nasa kustodiya ng RSOG-RID3 ang mga naarestong indibidwal at nakumpiskang ebidensiya para sa proper documentation at disposition. /Bistado