ILOILO CITY – Umabot sa mahigit tatlong kilo ng shabu na nagkakahalaga ng P20.68 milyon ang nasamsam ng Police Regional Office in Western Visayas (PRO-6) sa serye ng operasyon mula June 1 hanggang June 13.
Arestado rin ang 59 suspek sa 49 operasyon kontra ilegal na droga, ayon kay PRO-6 Director Brig. Gen. Randulf Tuaño sa press conference nitong Lunes.
Sinabi ni Tuaño na ito ang pinakamataas na shabu seizures sa hanay ng police regional offices sa bansa, batay sa operational performance evaluation ng Philippine National Police para sa naturang panahon.
“During this period, Police Regional Office 6 continued to demonstrate strong operational performance across key law enforcement campaigns while maintaining the peace and order situation throughout Western Visayas,” sabi ni Tuaño.
Bukod sa drug operations, nanguna rin sa buong bansa ang PRO-6 sa kampanya laban sa illegal logging, matapos makapagtala ng 33 naaresto sa 77 operasyon.
Pumangalawa naman ito nationwide sa anti-smuggling at kampanya kontra illegal fishing, kung saan 122 violators ang nahuli sa 268 operasyon.
Ayon kay Tuaño, ipinapakita ng mga accomplishment na ito ang tuloy-tuloy na commitment ng kanilang personnel sa pagpapatupad ng batas, pagprotekta sa mga komunidad, at pagsuporta sa vision ni Chief PNP Gen. Jose Melencio Nartatez Jr. na Bagong PNP para sa Bagong Pilipinas: Serbisyong Mabilis, Tapat at Nararamdaman.
Sa pinaigting na kampanya laban sa wanted persons, 105 fugitives naman ang naaresto sa parehong evaluation period.
Iniulat din ni Tuaño na 20 incidents lamang ang naitala sa rehiyon sa ilalim ng eight focus crimes, dahilan para mapabilang ang Western Visayas sa Top 5 Police Regional Offices na may pinakamababang crime incidence sa bansa.
Ayon sa kanya, ipinapakita nito ang pangkalahatang mapayapa at maayos na sitwasyon sa Western Visayas.
“These accomplishments demonstrate the dedication and professionalism of our personnel in carrying out their mandate to protect the people and uphold the law. We will continue to strengthen our operational capabilities, foster stronger partnerships with stakeholders, and sustain our efforts against all forms of criminality,” sabi ni Tuaño. /Bistado