Imbyerna ang fisherfolk group na Pamalakaya sa umano’y “crocodile tears” ni Sen. Pia Cayetano sa Senado, na ayon sa grupo ay pampalihis sa mas mabigat na usapin: ang papel ng Senate majority sa pagkupkop umano kay Sen. Ronald “Bato” Dela Rosa.
Sa pahayag nitong Huwebes, binatikos ng Pamalakaya ang “extended drama” sa Senado matapos umiyak umano si Cayetano kaugnay ng gun-related security breach sa Senate premises noong May 13.
Para sa grupo, hindi ang emosyon ng mga senador ang sentro ng isyu, kundi ang umano’y pagprotekta kay Dela Rosa, na may warrant of arrest mula sa International Criminal Court (ICC) kaugnay ng drug war.
“Can Senator Pia Cayetano refrain from playing like a victim when it’s they who protected a senator facing serious crimes against humanity in the ICC. How can Senator Cayetano maintain such a lie? This is a first-grade acting skill to deceive the public,” ani Pamalakaya National Chairperson Fernando Hicap.
Ayon sa Pamalakaya, nawawala sa focus ang Senate majority kung ang drama sa plenaryo ang pinaiiral habang nananatiling nakabinbin ang accountability issue laban kay Dela Rosa.
Si Dela Rosa, dating Philippine National Police chief, ay iniuugnay sa ICC investigation sa alleged crimes against humanity of murder bilang co-perpetrator ni dating President Rodrigo Duterte sa kampanya kontra droga.
Giit ng grupo, dapat harapin ng mga tumulong umano kay Dela Rosa ang posibleng pananagutan.
“May we remind the Senators in the majority bloc that the issue here is not about them, it’s about their institution that provided refuge and facilitated the escape of Bato Dela Rosa from an arrest warrant,” diin ni Hicap.
Kinontra rin ng Pamalakaya ang pribilehiyong umano’y ibinibigay kay Dela Rosa habang patuloy na naghahanap ng hustisya ang mga pamilya ng mga napatay sa Oplan Tokhang.
“Many victims of the bloody Oplan Tokhang continue to seek justice. Meanwhile, one of its main perpetrators is still being given privileges and protection by the Senate,” dagdag ni Hicap. /Bistado