Tutol si House Committee on Justice Chair at lead prosecutor Gerville “Jinky Bitrics” Luistro ng Batangas sa panukalang payagan ang remote participation o online voting ng senator-judges sa impeachment trial ni Vice President Sara Duterte.
Ayon kay Luistro, masyadong mabigat ang impeachment trial para hindi personal na masaksihan ng mga senator-judge ang bawat bahagi ng proceedings.
“My humble submission about this issue is dapat personal na nasasaksihan ng senator-judge ang trial at dapat personal din siyang boboto dahil napakahalaga ng prosesong ito,” ani Luistro sa radio program na Kongreso Ngayon @ Your Service hosted nina Manila Rep. Bienvenido Abante at veteran broadcaster Ed Sarto sa dzME.
Inilabas ni Luistro ang pahayag matapos banggitin ni Sen. Rodante Marcoleta ang posibilidad na payagan si Sen. Ronald “Bato” dela Rosa na lumahok at bumoto sa pamamagitan ng Zoom sa impeachment proceedings.
Si Dela Rosa, kilalang kaalyado ng Vice President, ay pansamantalang nanatili sa Senado noong nakaraang linggo matapos maglabas ang International Criminal Court ng arrest warrant laban sa kanya kaugnay ng madugong anti-drug campaign ng Duterte administration.
Kalaunan, umalis din si Dela Rosa sa Senate premises matapos makilahok sa botohan na nagbunsod ng Senate leadership change.
“With all due respect kay Sen. Rodante Marcoleta, we respect him and he is a former colleague in the House of Representatives. However, we need to consider the significance, the importance, the paramount of this impeachment process,” ani Luistro.
Giit ni Luistro, kailangang personal na makita ng senator-judges ang mga testigo, dokumento, at video evidence na ihaharap sa impeachment court.
“Napakahalaga po na personal na nakikita ng senator-judge ang bawat testigo,” sabi niya.
“Napakahalaga po na personal na nakikita ng bawat senator-judge ang bawat papel, video na inilalatag in support of the Articles of Impeachment.”
Ayon kay Luistro, mahalaga sa trial ang personal na pag-observe sa kilos, asal, at demeanor ng witness para masukat ang credibility at truthfulness nito.
“The demeanor tells you whether the witness is telling the truth or not,” ani Luistro.
Nagbabala rin siya laban sa pagpapasya sa impeachment case sa pamamagitan lamang ng online participation o online voting.
“Mahirap itong ipaubaya na dedesisyunan based on online voting only or online participation in the session,” sabi ni Luistro. /Bistado