Patuloy na magdadala ng malalakas na ulan ang Southwest Monsoon o habagat sa ilang bahagi ng Luzon hanggang Linggo, ayon sa Philippine Atmospheric, Geophysical and Astronomical Services Administration (Pagasa).
Sa Weather Advisory No. 19 na inilabas alas-11 ng umaga nitong August 27, inaasahan ang 50 hanggang 100 millimeters na ulan sa Benguet, La Union, Pangasinan, Zambales, Bataan, at Occidental Mindoro mula ngayong araw hanggang Biyernes ng tanghali, August 28.
Mas lalakas ang ulan mula Biyernes ng tanghali hanggang Sabado ng tanghali, August 29, kung kailan posibleng makaranas ng 100 hanggang 200 millimeters na ulan ang Benguet, Zambales, at Occidental Mindoro.
Sa parehong period, nasa 50 hanggang 100 millimeters naman ang inaasahang ulan sa Ilocos Sur, Abra, La Union, Pangasinan, Bataan, Pampanga, Tarlac, Cavite, at Batangas.
Mula Sabado ng tanghali hanggang Linggo ng tanghali, August 30, posibleng makaranas ng 100 hanggang 200 millimeters na ulan ang Benguet, Zambales, Bataan, at Occidental Mindoro.
Aabot naman sa 50 hanggang 100 millimeters ang posibleng ulan sa Ilocos Norte, Ilocos Sur, La Union, Pangasinan, Abra, Tarlac, Nueva Ecija, Pampanga, Bulacan, Metro Manila, Rizal, Cavite, at Batangas.
Ayon sa Pagasa, maaaring mas mataas pa ang rainfall sa mountainous at elevated areas. Maaari ring lumala ang epekto sa mga lugar na nakaranas na ng significant antecedent rainfall.
Pinayuhan ang publiko at concerned disaster risk reduction and management offices na gawin ang lahat ng kinakailangang hakbang para protektahan ang buhay at ari-arian. /Bistado