Iniutos ng Malacañang ang paglipat sa angkop na alternative work arrangements ng mga tanggapan ng gobyerno sa National Capital Region (NCR) at 12 probinsya simula alas-12 ng tanghali ngayong Lunes, August 17.
Sa ilalim ng Memorandum Circular No. 127, ipinatupad ang hakbang dahil sa patuloy na malakas na ulan dulot ng southwest monsoon o habagat.
Inilabas ang kautusan sa rekomendasyon ng National Disaster Risk Reduction and Management Council (NDRRMC) at kasunod ng heavy rainfall warnings ng Philippine Atmospheric, Geophysical and Astronomical Services Administration (Pagasa).
Bukod sa Metro Manila, sakop ng direktiba ang Zambales, Bataan, Bulacan, Pampanga, Tarlac, Nueva Ecija, Cavite, Batangas, Rizal, Laguna, Quezon at Occidental Mindoro.
Gagamit naman ng alternative learning modes ang mga klase sa lahat ng antas sa public at private schools sa mga naturang lugar, maliban kung may ibang direktibang ilalabas ang kani-kanilang local chief executives.
Hindi kasama sa alternative work setup ang mga ahensyang naghahatid ng basic at health services, tumutugon sa mga sakuna at kalamidad, at gumaganap ng iba pang vital services.
“Agencies involved in the delivery of basic and health services, preparedness/response to disasters and calamities, and/or the performance of other vital services shall continue their operations and render the necessary services,” nakasaad sa memorandum.
Maaari ring magpatupad ang mga local chief executive ng localized cancellation o suspension ng klase at trabaho sa mga tanggapan ng gobyerno sa ibang lugar na hindi sakop ng kautusan, alinsunod sa umiiral na mga batas at regulasyon.
Para naman sa private sector, management ang magpapasya kung magsususpinde ng trabaho o magpapatupad ng alternative work arrangements.
“The suspension of work or adoption of alternative work arrangements in the private sector shall be left to the discretion of management,” ayon sa circular.
Agad na nagkabisa ang Memorandum Circular No. 127. /Bistado