Itinalaga ni President Ferdinand Marcos Jr. si finance at investment veteran Victor Alfonso Limlingan bilang bagong president at chief executive officer ng Social Security System (SSS) nitong Biyernes, October 16.
Pinalitan ni Limlingan si Robert Joseph Montes de Claro, na itinalaga namang kalihim ng Department of Information and Communications Technology (DICT).
Kabilang sa mga prayoridad ng bagong SSS chief ang pagpapalawak at pagpapahusay ng loan programs para sa mga miyembro, pagpapataas ng risk-adjusted investment returns at muling paglulunsad ng Pension Booster Program.
Hindi na bago si Limlingan sa SSS. Naging miyembro siya ng Social Security Commission (SSC), ang policy-making body ng ahensya, bilang kinatawan ng employers’ group.
Itinalaga siya sa komisyon noong November 19, 2024 at nanumpa noong November 25 ng parehong taon.
Pinamunuan niya ang Risk Management and Actuary Committee at naging miyembro ng Investment, Contribution and Collection, at Corporate Governance committees.
Bago ang bagong appointment, nagsilbi si Limlingan bilang managing director ng Regina Capital Development Corp. at naging board member ng Development Bank of the Philippines, kung saan pinamunuan niya ang Risk Oversight Committee.
Naging senior vice president din siya ng Small Business Corp. at consultant ng National Economic and Development Authority at dating Housing and Urban Development Coordinating Council.
Nagtapos si Limlingan ng Master of Business Administration sa Kellogg School of Management ng Northwestern University at may Chartered Financial Analyst designation.
Kumuha rin siya ng interdisciplinary studies, major sa history at humanities, sa Ateneo de Manila University. /Bistado