Idineklara ng Senate impeachment court nitong Lunes na hostile witness si Gina Acosta, dating special disbursing officer (SDO) ng Office of the Vice President (OVP), sa paglilitis kay Vice President Sara Duterte kaugnay ng umano’y maling paggamit ng confidential funds.
Pinagbigyan ni Presiding Officer Senador Francis Escudero ang mosyon ng prosecution matapos tanungin si Acosta tungkol sa kasalukuyan niyang posisyon at employment relationship kay Duterte.
Kinumpirma ni Acosta na si Duterte ang kanyang boss at hawak niya ngayon ang coterminous na posisyong Vice Presidential Staff Officer VI.
Nang tanungin kung mawawala ang kanyang posisyon sakaling ma-impeach o matanggal sa puwesto si Duterte, sumagot si Acosta: “Wala na po akong trabaho sa OVP.”
Isinaalang-alang din ni Escudero ang posisyon ni Acosta sa counter-affidavit na inihain niya sa Office of the Ombudsman.
“In addition to the ground raised by Attorney (Amando Virgil) Ligutan that the witness has taken a position by virtue of her counter-affidavit filed before the Office of the Ombudsman, the court hereby declares the witness to be a hostile witness under and in accordance with Rule 132, Section 13,” pasya ni Escudero.
Dahil sa deklarasyon, maaari nang gumamit ng leading questions si private prosecutor Amando Virgil Ligutan sa pagtatanong kay Acosta. Nilinaw naman ni Escudero na bawal pa rin ang misleading questions.
Si Acosta ang unang witness na pormal na idineklarang hostile sa impeachment trial ni Duterte.
Hiniling ni Ligutan ang deklarasyon matapos iharap ang counter-affidavit ni Acosta sa reklamong may kaugnayan sa umano’y maling paggamit ng confidential funds. Ayon sa prosecutor, taliwas sa kaso ng prosecution ang posisyon ni Acosta na sumunod si Duterte sa mga patakaran at hindi dapat panagutin sa umano’y misuse ng pondo.
Tinutulan ito ng defense, na nagsabing kailangan munang patunayan sa examination ang adverse interest ni Acosta at hindi sapat na may nakabinbing reklamo laban sa kanya. Ibinasura ni Escudero ang argumento.
Layunin ng prosecution na patunayang inutusan umano ni Duterte si Acosta na i-encash ang ₱500 milyong OVP confidential funds sa apat na tranche mula December 2022 hanggang July 2023 at ibigay ang cash sa isang OVP security officer.
Igigiit din nitong hindi maayos na na-liquidate ang pondo at may mga paglabag umano sa Joint Circular No. 2015-01. Mga pahayag pa lamang ito sa offer of testimony ng prosecution at sasailalim pa sa testimonya ni Acosta at cross-examination ng defense.
Bahagi ang ₱500 milyon ng kabuuang ₱612.5 milyong confidential funds na sakop ng Article I—₱500 milyon para sa OVP at ₱112.5 milyon para sa Department of Education (DepEd) noong Education secretary pa si Duterte. /Bistado