Umatras ang Department of Trade and Industry (DTI) sa kontrobersyal na draft policy na magpapakuha sana ng permit para sa advertisements, kabilang ang online ads, matapos umani ng batikos mula sa small businesses, online sellers, creators, at mambabatas.
Sa public advisory noong May 23, 2026, nilinaw ng DTI na hindi nito ipatutupad ang draft Department Administrative Order.
“The Department of Trade and Industry (DTI) clarifies that it is not pursuing, implementing, or adopting the drafted Department Administrative Order,” saad ng ahensya.
Dagdag pa ng DTI, ang internal draft ay “does not reflect current policy direction and will not be finalized or enforced.”
Umani ng backlash ang proposal dahil hihingan sana ng permit ang advertisers 30 working days bago ilabas ang kanilang ads. Sakop sana nito ang online at traditional advertising platforms, kabilang ang sponsored posts, digital ads, videos, billboards, at promotional campaigns.
Sa draft rules, kailangan sanang magsumite ang advertisers ng detalyadong dokumento sa DTI, kabilang ang music, scripts, layouts, storyboards, camera directions, special effects, incidental sounds, at descriptions ng visuals na maaaring maging “potentially controversial or questionable.”
May kaakibat din sanang fees. Ang static advertisements, kabilang ang online at print materials, ay sisingilin ng P975. Para sa moving advertisements gaya ng videos at GIFs, aabot sa P975 hanggang P9,295 ang permit fees depende sa haba ng material. May P300 fee rin sana para sa amendments sa permit applications.
Ayon sa DTI, ang proposed rules ay para sana “to strengthen the protection of consumers against false, deceptive, and misleading advertising practices.”
Pero kinontra ito ng maraming negosyante at creators dahil dagdag proseso ito sa micro, small, and medium enterprises na hirap na sa permits, taxes, at tumataas na operating costs. Ayon sa isang ulat, SMEs ang bumubuo sa higit 95 percent ng Philippine businesses.
Isa sa pinakamalakas na pumalag si technology and business content creator at entrepreneur Carlo Ople.
“This is bordering on insanity already,” sulat ni Ople sa Facebook.
“You are over-regulating the only source of additional income for a lot of Filipinos,” dagdag niya.
Sumabay sa batikos si Sen. Bam Aquino IV, na nagsabing hindi dapat pahirapan ang maliliit na negosyo sa panahon ng mabilis na online commerce.
“Sa panahon ngayon kung saan mabilis ang takbo ng negosyo, lalo na online, hindi dapat paghintayin ng isang buwan ang mga negosyante bago sila makapaglabas ng advertisement o promo,” ani Aquino.
“In these fast times for commerce, especially online, it is unjust to make a small business wait one month before releasing an advertisement or promotion,” dagdag niya.
Hinimok ni Aquino ang DTI na bawiin ang proposal at ituon ang aksyon sa tunay na deceptive at fraudulent advertisements.
“Instead of adding bureaucracy, the DTI should focus on deceptive and fraudulent advertisements while helping legitimate businesses recover, grow, and create jobs for Filipinos,” ani Aquino. /Bistado