Naghahanda na nang mas maaga ang Department of Agriculture (DA) para sa inaasahang mas matinding El Niño, gamit ang mga aral mula sa nakaraang tagtuyot para protektahan ang produksyon, food supply at kabuhayan ng mga magsasaka at mangingisda.
Ayon kay Agriculture Secretary Francisco Tiu Laurel Jr., mas handa ngayon ang gobyerno matapos ang karanasan sa El Niño na sinalubong niya nang maupo sa DA noong November 2023.
“Mas handa na tayo ngayon,” ani Tiu Laurel.
Kabilang sa paghahanda ang paunang pagbili ng bigas, pataba at iba pang agricultural supplies, pagpapalawak ng storage capacity at pagtutok sa mga lugar na posibleng tamaan nang husto.
Naglaan din ang administrasyon ni Pangulong Ferdinand Marcos Jr. ng karagdagang P6.2 bilyon sa DA para sa fuel subsidies at iba pang tulong sa farmers, fisherfolk at agricultural truckers sa gitna ng mataas na fuel prices at inaasahang epekto ng El Niño hanggang unang kalahati ng 2027.
Lumilipat din ang DA sa foliar at soil ameliorants, kabilang ang bio-based at non-urea products, habang inaangkop ang interventions depende sa kondisyon ng bawat lugar.
Plano ring dagdagan ang paggamit ng fertilizer at planting seeds kung kinakailangan.
“Sa huli, tinitingnan natin ang worst-case scenario, kaya inaasahan natin na magiging mas mababa pa rin ang kabuuang produksyon,” ani Tiu Laurel.
Tinatayang maaaring mabawasan ng humigit-kumulang 700,000 metriko tonelada ang palay production sa pangunahing ani sa ikalawang kalahati ng taon dahil sa weather-related problems, kabilang ang El Niño.
Pinalalaki rin ng DA ang food reserves. Mayroon nang 365 active warehouses ang National Food Authority, mula sa humigit-kumulang 300 dati, matapos umupa ng dagdag na 165 facilities.
Nagbubukas din ng cold storage facilities para mapahaba ang shelf life ng karne at gulay.
Sinimulan na rin ang cloud seeding sa mga drought-hit area gaya ng Isabela at Negros.
“Gagawin namin ang lahat ng kinakailangan upang makatulong sa sitwasyon,” ani Tiu Laurel.
Nakikipag-coordinate rin ang DA sa Office of the President tungkol sa irrigation. Nakatulong naman ang malalakas na ulan mula sa habagat para mapuno muli ang ilang pangunahing dam, na maaaring magsuporta sa irrigation needs sa susunod na planting season. /Bistado