Dagdag na panahon ang ibinigay ng Bureau of Internal Revenue (BIR) sa mga taxpayer na naapektuhan ng habagat at problema sa eBIRForms upang makapaghain at makapagbayad ng kanilang buwis nang walang penalty.
Sa ilalim ng Revenue Memorandum Circular (RMC) No. 95-2026 na inilabas nitong Biyernes, inurong sa August 18 ang mga filing, payment, remittance at submission requirement na orihinal na nakatakda mula August 10 hanggang 16.
Kabilang dito ang applicable withholding tax returns, income tax returns, one-time transactions at iba pang tax obligations.
Saklaw ng extension ang mga BIR office sa:
-Metro Manila
-Ilocos Sur
-La Union
-Pangasinan
-Abra
-Apayao
-Benguet
-Ifugao
-Kalinga
-Mountain Province
-Bataan
-Bulacan
-Pampanga
-Tarlac
-Zambales
-Cavite
-Batangas
-Rizal
-Mindoro
Pinalawak din ang deadline extension para sa mga taxpayer na hindi nakapaghain dahil sa technical unavailability ng eBIRForms Offline Package.
“We recognize the difficulties faced by taxpayers affected by the rains, as well as those who are unable to comply because of the technical issues with eBIRForms. We are giving them additional time to complete their tax obligations without penalty,” ani BIR Commissioner Charlito Martin Mendoza.
Naglabas din ang BIR ng Bank Bulletin na nag-uutos sa mga Authorized Agent Bank (AAB) na tumanggap ng saklaw na tax returns at payments hanggang August 18 nang walang kaukulang penalty.
Saklaw nito ang mga taxpayer sa mga lugar na naapektuhan ng habagat at ang mga hindi nakasunod sa deadline dahil sa problema sa eBIRForms Offline Package.
Nilinaw naman ng BIR na hindi kasama sa extension ang mga taxpayer na obligadong gumamit ng Electronic Filing and Payment System (eFPS) ngunit hindi saklaw ng RMC No. 89-2026.
Kailangan pa rin nilang mag-file ng returns at magbayad ng buwis sa pamamagitan ng eFPS.
“We remind covered taxpayers to complete their filing and payment requirements by August 18. At the same time, we assure taxpayers that when circumstances beyond their control make compliance difficult, the BIR will continue to respond reasonably and give them a fair opportunity to comply,” ani Mendoza. /Bistado