Bahagyang humina ang Super Typhoon Bavi pero nananatiling mapanganib habang kumikilos pa-west northwestward sa labas ng Philippine Area of Responsibility (PAR), ayon sa Philippine Atmospheric, Geophysical and Astronomical Services Administration (Pagasa).
Sa Tropical Cyclone Advisory No. 3 na inilabas alas-11 ng umaga nitong July 7, huling namataan ang mata ni Bavi dakong 10 a.m. sa layong 1,845 kilometers east of Central Luzon.
Taglay nito ang maximum sustained winds na 185 kilometers per hour malapit sa sentro, pagbugsong umaabot sa 230 kilometers per hour, at central pressure na 930 hPa. Kumikilos ito west northwestward sa bilis na 20 kilometers per hour.
Umaabot hanggang 800 kilometers mula sa sentro ang strong-to-typhoon-force winds.
Inaasahang papasok si Bavi sa PAR sa pagitan ng Martes ng gabi, July 7, at Miyerkules ng madaling araw, July 8. Kapag nasa loob na ng PAR, tatawagin itong Inday.
Ayon sa Pagasa, mananatili itong super typhoon pagpasok sa PAR, pero unti-unting hihina habang lumalapit sa Extreme Northern Luzon at sa silangan ng Taiwan.
Mababa ang tsansa ng landfall sa alinmang bahagi ng Luzon. Pero dahil sa lakas at lawak ng hangin, posibleng magtaas ng wind signals sa northern at eastern portions ng Northern Luzon, pinakamaaga ngayong gabi o bukas ng umaga.
Pinakamataas na maaaring itaas sa pagdaan ng bagyo ang Signal No. 2 o 3.
Dahil hindi pa tiyak ang radius ng malalakas na hangin, hindi rin isinasantabi ang wind signals sa eastern portions ng Southern Luzon at Visayas.
Palalakasin ng enhanced Southwest Monsoon o habagat at ng periphery ni Bavi ang strong to gale-force gusts, lalo na sa coastal at upland areas.
Ngayong araw, posibleng maranasan ito sa kalakhan ng Mindanao. Bukas, July 8, kabilang ang Pangasinan, Zambales, Bataan, Cavite, Batangas, most of MIMAROPA, most of Bicol Region, most of Visayas, at most of Mindanao. Sa Huwebes, July 9, posibleng maapektuhan ang kalakhan ng bansa.
Para sa heavy rainfall outlook dahil sa habagat, sinabi ng Pagasa na sumangguni sa Weather Advisory No. 4 na inilabas alas-11 ng umaga.
Sa karagatan, inaasahang maglalabas ng Gale Warning bukas, July 8, dahil sa rough to very rough sea conditions sa northern at eastern seaboards ng Pilipinas.
Pinayuhan ng Pagasa ang publiko at mga concerned na disaster risk reduction and management offices na patuloy na bantayan ang mga update tungkol sa bagyo. /Bistado