Libu-libong nagluluksa ang sumama sa paghahatid sa huling hantungan ni Rene Clert “Bobet” Baterbonia sa Talacogon Memorial Park sa Agusan del Sur nitong Myerkules ng umaga.
Si Baterbonia, 18, na maglalaro dapat bilang rookie ng Ateneo de Manila University men’s basketball sa UAAP Season 89 ngayong taon, ay nalunod noong Hunyo 8 sa isang team building activity sa Dipaculao, Aurora.
Namatay rin ang kakamping Nigerian na si Divine Adili, 21, na ini-uwi na noong Lunes.
Nagpahayag ng pasasalamat si Rovelyn Baterbonia, ina ni Rene, sa sumuporta sa kanilang pamilya sa panahon ng pagdadalamhati.
“Your love, compassion, and solidarity have brought comfort and strength to our family as we mourn the loss of a beloved son whose life touched so many,” ani Mrs. Baterbonia.
Ang pamahalaang panlalawigan ng Agusan del Sur ay iginawad kay Baterbonia ang Datu Lipus Makapandong Award, sa pamamagitan ng Sangguniang Panlalawigan Resolution No. 369-26 na inaprubahan noong Hunyo 16.
“Though he may no longer be with us, Bobet’s passion, excellence, and inspiring journey will forever live on in the hearts of Agsurnons and in generations of athletes who aspire to follow in his footsteps. His legacy is not only remembered — it is immortalized,” ayon sa pamahalaang panlalawigan.
Nakibahagi rin si Prosperidad Bishop Ruben Labajo sa panawagan ng pamilya na malaman ang katotohanan hinggil sa kanyang pagkamatay.
“Let us pray that the truth will finally prevail and be known to everyone. Let us continue to ask and seek the truth together with prayer,” ani ng pari sa kanyang homiliya sa huling misa para kay Baterbonia sa municipal gymnasium.
Hinimok ng obispong Katoliko ang mga mahal sa buhay at kaibigan ni Baterbonia na humugot ng lakas mula sa Diyos.
“No one else can comfort us but God. Nothing can be resolved because of our anger and resentment,” dagdag ni Labajo.
Samantala, sinabi ni Interior Secretary Jonvic Remulla na malapit nang matapos ng mga awtoridad ang imbestigasyon.
Ayon kay Remulla, inaasahang makapanayam pa ng Criminal Investigation and Detection Group (CIDG) pati ang negosyanteng si Manny V. Pangilinan, chairperson at trustee ng MVP Sports Foundation na nagpopondo sa koponan, bago isumite ang ulat ng imbestigasyon sa Department of Justice (DOJ).
Sinabi niyang maaaring magsampa ng mga kasong kriminal kaugnay ng insidente, posibleng ngayong Biyernes.
“Our investigation is almost finished. It is pretty conclusive. On Friday, we will submit it to the DOJ for filing of the case,” ani Remulla.
Ayon pa ni Remulla, nakapagtala na ang mga imbestigador ng mahigit 1,200 pahina ng mga testimonya.
“We interviewed almost a hundred people. Maybe 1,200 pages of testimony from those who were there, and we are almost complete,” ani Remulla.
Sinabi rin ni Philippine National Police (PNP) chief Gen. Jose Melencio Nartatez Jr. na inaasahang magrerekomenda ang CIDG ng pagsasampa ng kaso laban sa 10 hanggang 11 miyembro ng coaching staff ng Ateneo men’s basketball team batay sa mga ebidensyang nakalap.
“We have a case, and it’s up to the prosecution to file a case. On the part of the PNP, we will forward or refer these records of investigation to the prosecution with the recommendations,” ani Nartatez.