Ibinenta ng pamilya ni Eugenio “Gabby” Lopez III kay businessman Ramon S. Ang ang 25.7-percent stake nito sa Lopez Inc., isang hakbang na posibleng tumapos sa matagal nang alitan sa loob ng prominenteng business clan.
Inihayag ni Lopez nitong Lunes na natapos na ng Crème Investment Corp.—ang holding company na ginagamit ng kanilang family branch—ang pagbebenta ng shares kay Ang.
Ginawa ni Ang ang investment sa kanyang personal na kapasidad sa pamamagitan ng wholly owned holding company nito. Hindi agad isinapubliko ang halaga ng transaksyon.
Magbibigay ang deal kay Ang ng malaking papel sa Lopez Inc., ngunit mananatili ang kontrol at pamamahala sa ibang branches ng pamilyang Lopez na may hawak pa rin ng majority stake.
Ayon kay Lopez, hindi lamang business strategy ang dahilan ng pagbebenta kundi ang hangaring maibalik ang pagkakasundo sa kanilang pamilya.
“This dispute has not been good for any of us, or for the people who work in our companies,” ani Lopez.
“This allows us to take a step towards the restoration of family peace.”
Magbibigay rin umano ang bentahan ng kalayaan sa kanilang family branch na ilipat ang resources sa ibang negosyong mas tugma sa sarili nitong mission. Ilalabas pa sa susunod ang iba pang detalye tungkol sa kanilang plano.
Para naman kay Ang, ang investment ay pagpapakita ng tiwala sa mga negosyo ng Lopez Group, na may interests sa power generation, real estate at entertainment.
“I came in because I believe in these businesses, and because a steady partner at the table can be good for everyone around it,” ani Ang.
Nilinaw niyang hindi lamang sa isang faction nakasentro ang kanyang relasyon sa pamilya.
“I am a friend to each, and I intend to stay that way,” dagdag niya.
Ayon kay Ang, mananatili sa pamamahala ang Lopez family branches na may controlling majority. Layunin umano niyang makatulong upang maging mas matatag ang grupo, hindi guluhin o agawin ang kontrol nito. /Bistado