Binandera ng Armed Forces of the Philippines (AFP) ang umano’y delikadong paglapit at pagmaniobra ng dalawang Chinese military aircraft laban sa isang Philippine military plane habang nagsasagawa ito ng routine maritime patrol sa Bajo de Masinloc nitong Sabado, October 3.
Sa pahayag ng AFP nitong Linggo, October 4, kinumpirma nitong isang C-208 aircraft ng militar ang nakasagupa ng dalawang Chinese military aircraft sa paligid ng Bajo de Masinloc. Isa sa mga ito ang kinilalang J-16 fighter aircraft.
Ayon sa AFP, paulit-ulit na lumapit ang J-16 at nagmaniobra nang malapit sa Philippine aircraft.
Kabilang umano rito ang paglipad sa unahan at paligid ng C-208 at pagposisyon mismo sa wake o turbulent air flow sa likod ng Philippine aircraft.
“These maneuvers posed an aviation safety risk,” ayon sa AFP.
Sa kabila nito, nanatiling maingat ang Philippine aircrew at sinunod ang established aviation procedures.
“The Philippine aircrew remained professional and exercised due caution in accordance with established aviation procedures,” pahayag ng AFP.
Nakumpleto ng C-208 ang assigned maritime patrol at ligtas na nakabalik nang wala nang sumunod na insidente.
Tinukoy ng AFP ang nangyari bilang bahagi ng paulit-ulit na “unsafe and coercive behavior” laban sa Philippine government vessels at aircraft na nagsasagawa ng lawful operations sa West Philippine Sea.
“This incident is part of a recurring pattern of unsafe and coercive behavior against Philippine government vessels and aircraft conducting lawful operations,” ayon sa AFP.
“The AFP will continue to document and expose such actions that place Philippine personnel and assets at unnecessary risk.”
Tiniyak din ng militar na hindi nito ihihinto ang routine maritime at air patrols sa West Philippine Sea sa kabila ng naturang close encounter.
“The AFP will continue to conduct routine maritime and air patrols in the West Philippine Sea. The AFP remains vigilant and will continue to prioritize the safety of its personnel and aircraft while carrying out its mandate,” ayon sa pahayag.
Dagdag ang insidente sa serye ng close encounters sa paligid ng Bajo de Masinloc, na kilala rin bilang Scarborough Shoal at tradisyunal na fishing ground ng mga Pilipino. /Bistado