Timbog ang apat na Chinese national na umano’y sangkot sa cyber fraud sa intelligence-driven operation laban sa hinihinalang illegal Philippine Offshore Gaming Operator (POGO)-related activities sa Muntinlupa City.
Ayon sa Bureau of Immigration (BI), nahuli umano sa aktong nagsasagawa ng cyber fraud sina Qiao Zhong, 30, isang undocumented foreign national; Tang Ke, 31, isang overstaying foreign national na walang proper visa; Liu Peng, 35, isa ring overstaying foreign national; at Zhang Caiyu, 42.
Si Zhang ay overstaying din, may umiiral na blacklist order at natukoy na dating POGO worker.
Batay sa ulat ni BI Fugitive Search Unit (FSU) Chief Rendel Sy, isinagawa ang operasyon noong Setyembre 4 matapos makatanggap at mag-monitor ang BI ng impormasyon hinggil sa umano’y nagpapatuloy na POGO-related operations sa Montillano Street, Alabang.
Bago ang operasyon, naglabas ang BI ng Mission Order No. 2026-321 noong Setyembre 3 na nag-aatas sa FSU na beripikahin ang impormasyon at gumawa ng kaukulang aksyon.
“The Bureau of Immigration will remain relentless in enforcing our immigration laws and in supporting the government’s policy to shut down illegal POGO operations. We will continue to use intelligence-led operations to identify and apprehend foreign nationals who violate Philippine laws,” ani BI Commissioner Joel Anthony Viado.
Nanawagan din si Viado sa publiko na agad ireport sa BI ang anumang impormasyon o obserbasyon tungkol sa mga dayuhang hinihinalang sangkot sa illegal activities sa bansa. /Bistado