Nagbukas ang Land Transportation Franchising and Regulatory Board (LTFRB) ng 8,750 bagong slots para sa Transport Network Vehicle Service (TNVS) sa Metro Manila, Ilocos Region at Bicol Region, na malaking bahagi ay inilaan sa electric vehicles.
Inaprubahan ang hakbang sa ilalim ng pamumuno ni Department of Transportation (DOTr) Secretary Giovanni “Banoy” Lopez kasunod ng tumataas na demand sa ride-hailing services bunsod ng paglago ng turismo, negosyo at urban areas sa tatlong rehiyon.
Ayon kay Acting LTFRB Chairman Atty. Greg G. Pua Jr., pinakamalaking bahagi ang mapupunta sa Metro Manila kung saan 7,500 slots ang eksklusibong inilaan sa battery electric vehicles (BEVs) at plug-in hybrid electric vehicles (PHEVs).
“Conventional internal combustion engine (ICE) vehicles, hybrid electric vehicles (HEVs) other than PHEVs, and other vehicle technologies that do not fall within the BEV or PHEV classifications shall not be eligible for the slots opened herein,” nakasaad sa LTFRB Memorandum Circular 2026-084.
Ibabatay sa registration records ng Land Transportation Office (LTO) at iba pang applicable government standards ang classification ng mga sasakyan.
Sa Ilocos Region, 650 TNVS slots ang binuksan at kalahati nito ay nakalaan sa electric vehicles.
Tig-150 slots ang inilaan sa Ilocos Norte, Ilocos Sur at La Union, habang 200 naman sa Pangasinan. Pantay na hahatiin sa internal combustion engine at non-internal combustion engine vehicles ang slots sa bawat lalawigan.
Sa Bicol Region, kalahati rin ng 600 bagong TNVS slots ang inilaan sa electric vehicles.
Ayon kay Pua, bahagi ang allocations ng pagtulak ng pamahalaan sa mas moderno at environment-friendly na public transportation.
“We in the LTFRB are sensitive to the request and demand from the people, and the opening of the slots is also in support of the government’s aggressive economic push across the country,” ani Pua.
Batay sa monitoring at pag-aaral ng LTFRB, hindi na sapat ang kasalukuyang TNVS allocation upang matugunan ang geographic coverage at dumaraming commuters sa tatlong rehiyon.
Tinukoy rin ang paglago ng urban, commercial, government at tourism centers bilang mga dahilan sa pagtaas ng pangangailangan para sa ligtas, maaasahan at accessible na transport services.
Magsisimula ang pagtanggap ng aplikasyon para sa mga bagong TNVS slots kapag nailathala na sa newspaper of general circulation ang kaukulang memorandum circulars. /Bistado