Hinigpitan ng Senate impeachment court ang pagbabawal sa communication-capable devices ng mga witness matapos kumalat online ang AI-generated image na maling nagpapakitang may suot na earpiece ang isang prosecution witness sa impeachment trial ni Vice President Sara Duterte.
Bago ipagpatuloy ang trial nitong Martes, iniutos ni Presiding Officer Sen. Francis “Chiz” Escudero na kunin muna ng court personnel ang anumang communication-capable devices ng witnesses bago sila sumalang at tiyaking malinaw nilang tinatanggap ang rules ng impeachment court.
“Every witness must testify nevertheless, solely from his or her own knowledge, free from coaching or influence from counsel or any other person,” sabi ni Escudero.
Kasunod ito ng pagkalat ng altered image ni Office of the Vice President (OVP) Assistant Secretary at Assistant Chief of Staff Lemuel Ortonio, na tumestigo noong nakaraang linggo tungkol sa paggamit ng OVP ng confidential funds at kalaunang idineklarang hostile witness.
Mariing itinanggi ni Escudero ang claim na tumatanggap ng impormasyon si Ortonio sa pamamagitan ng earpiece habang nasa witness stand.
“Again, to reiterate, what he had was a front-fold helix. An ear piercing in the front-fold helix of his ear, not an earpiece,” sabi niya.
Sakop ng pagbabawal ang earpieces, headsets, cellphones, smartwatches, smart glasses, at katulad na devices na kayang mag-transmit o tumanggap ng impormasyon.
Bawal ding tumanggap o magtangkang tumanggap ang witness ng communication, suggestion, answer, signal, message, o prompt mula kaninuman sa loob o labas ng impeachment court.
Mananatili ang restrictions kahit recess at hanggang pormal na i-discharge ng court ang witness.
Ginamit din ni Escudero bilang analogy ang Section 21 ng amended Supreme Court Guidelines on the Conduct of Videoconferencing, na nagbabawal sa cellphones, tablets, at katulad na gadgets at materials para maiwasan ang coaching at disturbance.
Sa parehong guidelines, itinuturing na gross misconduct at direct contempt of court ang coaching ng witness at knowingly presenting falsified digital images o evidence.
Inatasan ni Escudero ang impeachment court clerk na ipaliwanag ang rules sa bawat witness, kunin ang prohibited devices bago sila manumpa, at kumuha ng express confirmation on record na naiintindihan at susundin nila ang directive.
Agad na nagkabisa ang kautusan at ipatutupad sa mga susunod na witnesses. Ang anumang paglabag ay haharapin sa ilalim ng disciplinary powers ng impeachment court. /Bistado