Walang kasinungalingan, malisya o intensiyong bastusin ang Senate Impeachment Court sa social media post ni prosecution counsel Atty. Amando Virgil Ligutan tungkol sa pagbabawal sa misleading questions, iginiit ng House prosecution panel nitong Huwebes.
Ipinagtanggol ni private prosecutor at legal spokesperson Atty. Benjamin “Jay” Tolosa Jr. si Ligutan matapos akusahan ng defense panel na lumabag ito sa sub judice rule dahil sa post kasunod ng mainit na palitan sa impeachment trial ni Vice President Sara Duterte.
“Sa aming palagay, wala kaming nakikitang naging masama doon,” ani Tolosa.
Habang ongoing ang Senate impeachment trial kahapon, August 12, nagpost si Ligutan sa Facebook, “A principle ALL lawyers and law students know by heart: Misleading questions are NOT allowed even on cross-examination.”
Bago matapos ang pagdinig, pinuna ni defense counsel Atty. Shiela Sison ang nasabing pagpopost.
Pero para kay Tolosa, basic rule on evidence lamang ang ipinaliwanag ni Ligutan at hindi nito diniktahan ang mga senator-judge kung paano dedesisyunan ang kaso.
“Mayroon ba siyang sinabi na hindi makatotohanan? Wala naman ho,” ani Tolosa. “It was just guidance with respect to an elementary evidentiary rule,” dagdag niya.
Ipinaliwanag niyang magkaiba ang leading at misleading questions. Ang leading question ay nagmumungkahi ng sagot na nais makuha ng abogado at karaniwang pinapayagan sa cross-examination. Ang misleading question naman ay nakabatay sa facts na hindi pa naitatatag o salungat sa testimony.
“Totoo naman talaga: either direct or cross-examination, hindi pinapayagan ang misleading questions,” sabi ni Tolosa.
“It was not made with malice. He did not intend to disrespect anyone. Again, it’s just a statement of an elementary evidentiary rule,” dagdag niya.
Sinabi naman ni House trial spokesperson at Kabataan Party-list Rep. Renee Co na mahalagang malinaw ang pagkakaiba dahil nanonood din sa trial ang mga law student at batang abogado.
“Maganda maging klaro tayo: hindi po puwede ang misleading questions; on cross, leading puwede,” ani Co.
Nilinaw din ni House prosecutor at Akbayan Party-list Rep. Chel Diokno na hindi lahat ng pagtalakay sa pending case ay awtomatikong paglabag sa sub judice rule.
“Ang pinagbabawal lang ay any statements that are intended to influence the outcome of the case,” ani Diokno.
Ayon sa kanya, hindi bawal ang factual reporting sa mga nangyari sa hearing o pagpapaliwanag ng legal procedure. Naiiba umano ito sa pampublikong pagtalakay kung napatunayan na ng ebidensya ang impeachment charge.
“I think that both sides should have that opportunity to speak about the case, basta, within the limits imposed by the law,” sabi ni Diokno. /Bistado