Bagong export market ang nabuksan para sa Philippine cacao matapos ipadala sa New Zealand ang unang commercial shipment ng fermented cacao beans mula Davao del Norte.
Ang 6,000-kilogram o anim na metric ton na kargamento ay nagmula sa Kapalong at pormal na ipinadala ng Department of Agriculture (DA) at Headcorp CY sa Carmen, Davao del Norte.
Umalis ito sa Pilipinas noong July 13 at inaasahang darating sa Port of Lyttelton sa kalagitnaan ng August.
Ayon kay Agriculture Secretary Francisco Tiu Laurel Jr., patunay ang shipment na nakalilikha ng dagdag na kita para sa mga magsasaka ang pagbubukas ng international markets. Makakatulong din umano ang mas malakas na agricultural exports sa pagpasok ng foreign exchange at pagbawas sa agricultural trade deficit ng bansa.
“Bawat bagong export market na ating nabuksan ay nagbibigay sa ating mga magsasaka ng panibagong pagkakataong kumita nang higit mula sa kanilang mga produkto, habang nagdadala rin ng mas maraming foreign exchange sa bansa,” ani Tiu Laurel. “Kailangan nating patuloy na palawakin ang mga merkadong ito dahil ang mas malakas na agricultural exports ay nangangahulugan ng mas mataas na kita para sa mga magsasaka at mas malaking ambag ng agrikultura sa mas malawak na ekonomiya.”
Isinagawa ang shipment sa pamamagitan ng Pemline Export Trading Co., katuwang ang Kapalong Cooperative.
Bago bumiyahe, sinuri ng mga opisyal ng DA at Plant Quarantine Service ang mga cacao bean para matiyak na pasado ang mga ito sa import standards ng New Zealand.
Sumailalim din ang mga produkto sa limang araw o 120 oras na fumigation gamit ang aluminum phosphide. Sinundan ito ng kinakailangang aeration period bago kinumpleto ang mga dokumento at iba pang regulatory requirements.
“Ito ay malinaw na testamento na ang ating mga target na intervention upang bigyang-kapangyarihan ang mga lokal na producer at gawing makabago ang supply chains ng mga high-value export crop ay nagbubunga na ng konkretong tagumpay sa pandaigdigang merkado,” ani Agriculture Undersecretary Philip Young.
Bahagi ang shipment ng export campaign ng DA sa ilalim ng Department Order No. 12, Series of 2026, sa pamamagitan ng High-Value Export Crops and Agri-Fishery Export Development and Promotion unit.
Bukod sa unang order, mahalaga rin sa mga cacao farmer ang pagpasok sa isang merkadong may mahigpit na pamantayan. Kapag napanatili ang kalidad at tuloy-tuloy na supply, maaari itong magbukas ng mas marami pang order para sa Philippine cacao. /Bistado