Mga Christmas activity, appreciation night, tree planting, gift-giving at iba pang public event ang isinumite ng Office of the Vice President (OVP) bilang umano’y patunay na sumusuporta sa confidential fund reward payments nito noong December 2022, ayon sa isang state auditor.
Nilinaw sa pagdinig na ang mga aktibidad ay inilista bilang dokumentong magpapatunay sa matagumpay na information-gathering o surveillance, ngunit hindi tuwirang sinabi ng auditor na ginastos mismo sa mga event ang pondo.
Sa pagtestigo nitong Martes sa Senate Impeachment Court, sinabi ni Commission on Audit (COA) supervising auditor Xylene Mae Del Campo na isinumite ng OVP ang listahan bilang tugon sa Notice of Suspension sa una nitong ₱125-milyong confidential-fund release.
“Ito po ay naging attachment nila as documents evidencing success of information-gathering and/or surveillance activities na required po kapag nagkakaroon ng payment of rewards,” ani Del Campo.
Nasa listahan ang 105 aktibidad mula December 13 hanggang 31, 2022. Sakop lamang ng cash advance ang December 21 hanggang 31.
Kabilang sa mga entry ang Department of Education 2022 Partners Appreciation Night sa Mandaluyong noong December 13; anniversary at youth campaign ng Knights of Rizal Supreme Council sa Baguio noong December 15; at Christmas activities sa Happy Land at Barangay 101 sa Tondo noong December 17.
Kasama rin ang consultation at “pasasalamat” meetings, tree planting, wheelchair distribution, gift-giving, medical missions at mga aktibidad ng OVP satellite offices.
Ayon kay Del Campo, hindi kabilang ang appreciation night at mga katulad na event sa pinapayagang confidential activities sa ilalim ng Joint Circular No. 2015-01.
“Base po doon sa enumeration kung saan gagamitin ang confidential funds, hindi po ito nakasama doon,” aniya.
Ipinaliwanag niyang dapat aprubado ng agency head ang reward payments, may dokumentong magpapatunay sa matagumpay na information-gathering o surveillance mula sa informer, at direktang konektado sa confidential activities ng ahensiya.
“Base po sa documents na ito, hindi po namin nakita ’yung particular accomplishment,” sinabi ni Del Campo.
May problema rin umano sa timing dahil ang ilang aktibidad mula December 13 hanggang 18 ay naganap bago ang authorized utilization period. Tinanong ni Senate President Francis Escudero kung maaaring gamitin ang pondo bilang reimbursement sa naunang gastos.
“Yes po, kasi under the Joint Circular, meron pong portion doon na hindi puwedeng gamitin for reimbursement ’yung pondo ng confidential,” sagot niya.
Matapos suriin ang tugon at attachments ng OVP, nag-draft si Del Campo ng Notice of Disallowance. Kalaunan, pinagtibay ng COA ang disallowance ng ₱73.287 milyon mula sa 2022 confidential-fund spending ng OVP. /Bistado