Isinailalim na ng Department of Labor and Employment (DOLE) sa iisang tanggapan ang pagproseso ng mga permit para sa mga dayuhang nagtatrabaho sa Pilipinas.
Sa ikalawang DOLE Regional Interagency Coordinating Committee meeting nitong July, inilatag ng mga opisyal ang Department Order No. 248-B, Series of 2026. Inilipat nito mula sa mga regional office patungo sa Bureau of Local Employment (BLE) Central Office ang lahat ng tungkulin kaugnay ng Alien Employment Permit (AEP).
Sakop ng sentralisasyon ang pagtanggap, pagproseso, pagsusuri, pag-apruba o pagtanggi, pag-isyu at pagpapalabas ng AEP. Hawak na rin ng BLE ang adjudication, enforcement at pag-iingat ng mga opisyal na rekord.
Ayon kay BLE Director IV Patrick P. Patriwirawan Jr., isinentro ng DOLE ang sistema matapos mapansin ang magkakaibang pagpapatupad ng ilang probisyon sa mga rehiyon.
“Our observation from last year’s implementation was that a number of regional offices had different ways of interpreting some of the provisions of the implementing rules,” ani Patriwirawan.
Nagkaroon aniya ng pagkakaiba sa format ng publication at documentary requirements. Layunin ng paglipat sa iisang tanggapan na maging pare-pareho ang pagpapatupad ng mga regulasyon sa buong bansa.
“We want to make sure that there’s a single point of accountability within the Department of Labor and Employment to ensure and maintain the integrity of the AEP management system,” sabi niya.
Ang BLE na rin ang mangangasiwa sa labor market at economic needs tests, gayundin sa pag-isyu ng Certificates of Exemption at Certificates of Exclusion.
Niluwagan din ng bagong kautusan ang publication requirement. Maaari nang gumamit ang employer ng isang publication lamang sa newspaper of general circulation.
Nilinaw din ang pagpapatupad ng Understudy Training Program at Skills Development Program para sa mga kumpanyang may fiscal incentives sa ilalim ng Foreign Investments Act at Public Services Act. Kasama rito ang mga rehistrado sa investment promotion agencies at sakop ng Strategic Investments Priority Plan.
Hindi na kailangang muling ihain ang mga aplikasyong nakabinbin sa regional offices. Ililipat ang mga ito sa BLE at ipagpapatuloy mula sa kasalukuyang yugto ng pagproseso.
“Nothing has changed in terms of the process cycle time, procedures, and documentary requirements. Only the office responsible has changed,” paglilinaw ni Patriwirawan.
Hindi rin nagbago ang documentary requirements, bayarin at 15-working-day processing period. Maaari nang direktang magsumite ang mga employer sa BLE sa Intramuros, Manila, o sa opisyal na email ng bureau. /Bistado