Arestado ang 11 drug suspects habang mahigit P19 milyon halaga ng hinihinalang shabu ang nasamsam sa magkakahiwalay na operasyon ng Philippine National Police (PNP) sa anim na rehiyon.
Isinagawa ang mga operasyon mula Miyerkules, July 15, hanggang madaling araw ng Huwebes, July 16. Umabot sa mahigit 2.7 kilo ang kabuuang timbang ng nakumpiskang hinihinalang shabu na may Standard Drug Price (SDP) na lampas P19 milyon.
Kabilang sa mga nadakip ang ilang itinuring na High-Value Individuals (HVIs).
Nakipagtulungan ang mga yunit ng pulisya sa iba pang law enforcement agencies sa Regions 2, 4A, 5, 8 at 10, gayundin sa National Capital Region (NCR).
Sa Alicia, Isabela, nagsilbi ang mga awtoridad ng warrant of arrest kaugnay ng kasong murder. Nauwi ang operasyon sa pagkakasamsam ng tinatayang isang kilo ng hinihinalang shabu na nagkakahalaga ng P6.8 milyon.
Nakuha rin sa operasyon ang mga baril at iba pang ebidensiya. Hindi tinukoy sa ulat ang bilang o uri ng mga armas.
Tatlong HVI naman ang naaresto sa pinagsanib na anti-drug operation sa Camarines Sur. Nasamsam sa kanila ang tinatayang 550 gramo ng hinihinalang shabu na nagkakahalaga ng P3.74 milyon.
May iba pang mga suspek na nadakip sa magkakahiwalay na buy-bust operation sa Iligan City, Batangas City, Manila, Tacloban City at Naga City.
Sa bawat operasyon, nasa 173 hanggang 400 gramo ng hinihinalang shabu ang nakumpiska.
Nasa kustodiya na ng pulisya ang 11 suspek habang inihahanda ang mga kaukulang reklamo laban sa kanila.
Isinailalim naman sa dokumentasyon at laboratory examination ang lahat ng nakuhang ebidensiya. /Bistado