Habang sinisimulan ang rehabilitasyon ng mga paaralang naapektuhan ng Bagyong Inday at Habagat, pinatitibay naman ng Department of Education (DepEd) ang paghahanda sa posibleng pag-alboroto ng Bulkang Kanlaon.
Tiniyak ni Education Secretary Sonny Angara na tututukan ng kagawaran ang kaligtasan ng mga mag-aaral at ang pagpapatuloy ng pag-aaral sa panahon ng sakuna.
“Under our Education in Emergencies policy, every school is expected to be ready to protect learners while ensuring that learning continues safely. As we help communities recover from Typhoon Inday, we are also strengthening preparedness in areas affected by Kanlaon so our schools can respond quickly, adapt effectively, and continue serving our learners,” ani Angara.
Sinusuri na ng mga school disaster teams at schools division office ang pinsala at pangangailangan sa imprastraktura para maibalik ang ligtas na pag-aaral.
Batay sa July 10 situation report ng DepEd Disaster Risk Reduction and Management Service (DRRMS), 81 silid-aralan sa anim na rehiyon ang napinsala. Kabilang dito ang 43 na bahagyang nasira, 20 na nagtamo ng malaking pinsala at 18 na tuluyang nawasak.
Patuloy pang bineberipika ng mga engineering team ang datos.
Naapektuhan ang mga paaralan sa 11 rehiyon sa kasagsagan ng Inday at Habagat. Nagpatupad ang DepEd ng flexible learning at iba pang learning continuity measures.
Nakaalerto rin ang kagawaran sa Negros Island Region. Batay sa July 13 bulletin ng Philippine Institute of Volcanology and Seismology (Phivolcs), nananatili sa Alert Level 2 ang Kanlaon. Walong volcanic earthquakes ang naitala sa loob ng 24 oras.
Bawal pa ring pumasok sa four-kilometer Permanent Danger Zone dahil sa posibilidad ng biglaang phreatic o steam-driven eruptions at iba pang mapanganib na aktibidad.
Inatasan ang mga schools division office na suriin ang kalagayan ng mga paaralan, i-update ang contingency plans, maghanda ng emergency supplies, pangalagaan ang school records at learning resources, at maglatag ng alternatibong paraan ng pag-aaral.
Nakikipag-ugnayan din ang DepEd sa Phivolcs, Philippine Atmospheric, Geophysical and Astronomical Services Administration (Pagasa), Office of Civil Defense (OCD), mga lokal na pamahalaan at iba pang ahensya.
“The lessons from every emergency strengthen our resolve to build a more resilient education system. Our commitment is to ensure that every Filipino learner has a safe school, uninterrupted learning, and the support they need, no matter the challenges they face,” dagdag ni Angara. /Bistado